六月中受南加州台灣基督教聯合靈修會（TPC）邀請去分享「台語文電腦工具kap網路資源」，我順續由郭得列牧師駛車載我去拜訪養病中ê蕭泰然教授。

 

陳佳芬姊安排阮tī六月18日下午三點去到蕭府，chhi̍h電鈴了後，蕭夫人滿面笑容來開門，請阮tī客廳坐落來了後，蕭教授就落樓來迎接阮。阮兩人已經十gōa年無見面loh,握手久久chiah放。看伊精神飽足，講話聲音有khah弱，卻也hō͘我感覺伊ê身體有漸漸teh回復，心內講出：「感謝主！」

 

回想1996年kap陳隆兄同齊去聆聽二二八紀念音樂會，soah會ê時遇tio̍h蕭教授，陳隆兄就講順續載蕭教授tńg去in厝。這是kap蕭教授初見面，hit當時我得tio̍h文建會獎助boeh出版《讓音樂燃亮生命》（慕光叢書5，雅歌，1996），就邀請蕭教授為hit本冊寫序。聽我講hit本冊是teh描寫台灣傑出ê視障音樂家，伊一聲就答應，chit-ê初見面ê見面禮hō͘我真大ê鼓舞。

 

2001年我翻譯男高音安德烈．波伽利（Andrea Bocelli, 盲人）ê傳記《新世紀之聲─安德烈．波伽利》（遠流，2001），mā有請蕭教授寫序。我kap我ê中文寫作指導曹永洋老師，kā譯稿送去淡水海明威大廈ê蕭教授府上，伊真歡喜答應為hit本冊寫序，koh請阮食中晝，hō͘我感覺真溫馨。Hit當時伊有講：「我心臟開刀ê時是一陣台灣朋友kā我救起來ê，我欠台灣人ê情，我ê身體雖然iáu真虛弱，也tio̍h繼續為台灣寫曲。伊所作ê曲lóng充滿「台灣心kap台灣情」，真chē名曲也有tī世界各大音樂會演奏，用音樂tī國際上為台灣出聲，提升台灣ê知名度。

 

一直忠實為蕭教授整理樂譜製譜ê莊傳賢先生，有kā蕭教授ê一生經歷整理出版《世界級ê台灣音樂家─蕭泰然》（蔡明雲撰文，玉山社，2006）。我讀了真感動，感謝主賞賜咱台灣chit位有台灣心koh有台灣情ê作曲家，來激勵台灣人ê心。讀完chit本冊，我就下決心一定tio̍h去拜訪chit位老朋友，並且採訪錄影製片來上網，hō͘ koh-khah chē人來siàu念伊。

 

蕭教授是一位虔誠ê基督徒，青年時代tī教會kap學校就有傑出ê音樂表現。採訪中我講起冊中ê chit段記事ē-sái做現此時台灣青年ê模範，請伊講出hit當時ê實況來kap台灣青年分享。伊謙卑講：「Boeh做模範是m̄敢講，只有盡我所能（ē）來做，chit-má ê人ē-tàng做比我khah-chē好ê tāi-chì，來hō͘台灣ê青年得tio̍h koh-khah chē ê利益。」

 

《世界級ê台灣音樂家─蕭泰然》chit本冊是蕭教授ê傳記，有詳細描寫記述伊一生ê奮鬥，被迫離鄉背井、kap病魔爭鬥，伊講lóng是óa靠主ê恩典kap保守。請大家tio̍h去買chit本冊來讀，chit-pái ê採訪錄影記錄，請參觀台語信望愛 http://taigi.fhl.net/ 台語影音園區/第77篇，或直接點選 http://taigiol.fhl.net/vcd/rotaiugbk.php?user=taigi&bid=1&proc=read&msgno=77 ，請大家繼續來為蕭教授祈禱。