「媠」、「䆀」這lō代誌，攏講是在人--ê，人若感覺媠就是媠，人若看著－䆀就是䆀，「媠䆀無比止，愛--著較慘死」，媠䆀iah䆀媠，儘看看敢有中人意。

偏偏這个世間，一樣米飼百樣人：伊看講有夠媠--ê，你實在看無 啊he是佗leh媠；你嫌人䆀甲有賰--ê，人伊都感覺－嘿！閣袂䆀neh！⋯⋯人kap人之間，欲有「同感」oan-ná無簡單，對媠䆀ê感覺、感受，有一个西洋傳--來-ê、咱本底無ê名詞，叫做「美感」。

講起「美感」，人若無看字，犯勢有可能sa無，m̄-koh，若去講著「肉感」，這逐个現聽隨知，就是「肉肉肉」的「感」覺。按呢講--來，「美感」就是「美美美」ê感覺囉？！⋯⋯M̄知為啥物，查某人生了䆀，會hông笑「阿䆀--ê」，若是生了媠，soah若像無人leh叫「阿媠--ê」；正經號名攏是號「美」無號「媠」，「阿美仔、阿美仔」按呢叫，chiâⁿ親切ê菜市仔名。「美女」、「媠查某」，袂講「媠女」、「美查某」，「美」kap「媠」到底是啥物關係？我無聊無聊，攏kā想講，「水」是leh止喙ta--ê、是會當kā骯髒物洗清氣--ê，不而過，閣較按怎講，嘛是就愛食「米」，腹肚才會飽；「米」kap「水」，是咱稻作文化ê族群，上kài基本ê生存要件。

咱o-ló一个姑娘仔kài媠，會講伊「媠～噹噹」，he「噹噹」兩聲，敢有啥物特別ê意義？換別个聲音敢袂用--得？Bat聽人講，he「噹噹」ê音響效果，是代表古早古早chiok會堪得妝ê美女，金釵耳勾phoa̍h鍊手環腰帶玉佩一身齊備，人袂到，聲先到，行著路，配件叮叮咚咚噹噹，「媠」是目睭看--ê，「噹噹」是耳仔聽--ê，組合--起-來構成咱對一个美女ê認知——這m̄知是有稽考ê正經話，iah是pûn雞胿leh講笑。囡仔時代狡怪性，攏會kā「噹噹」閣繼續「噹」--落-去，媠「噹噹噹噹」、「噹噹噹噹」，啊！命運ê挵門聲，媠姑娘仔來--ah！加噹欲幾ā聲，表示真正有夠媠ê媠。

「䆀」出現ê時，m̄知為啥物，後壁tiāⁿ會拖兩个枷，「䆀kê-kê」、「䆀枷枷」，「䆀」kap「枷」哪會縛做伙？人人攏愛媠，「䆀」soah有影親像一副無形ê枷，䆀人受外貌來限制，佳哉，這款限制m̄是hiah-nī絕對--ê，媠人嘛有媠人ê枷，敢m̄是？⋯⋯一直到出社會食頭路，我才知影有一種物件嘛叫做「kê（膎）」，看著玻璃矸仔內底有擠蝦仔--ê，嘛有擠花枝--ê，閣有擠丁香--ê，chhiⁿ--ê無過sa̍h就擠入去豉，豉甲鹹剁剁，夾一屑仔出來配糜配飯，豉膎的海口人講這讚--ê、這chiok好食，我想講彼內底的物仔攏是chhiⁿ--ê，m̄就等於豉ê sa-sí-mih？平洋sông我，對he透明ê矸仔內擠甲密chiuh-chiuh、該爛未爛ê海洋生物，略仔會驚驚，彼時去想著「䆀膎膎」。

媠kap䆀，逐工目睭peh金，就出現tī咱ê生活中。有ê人對「媠」chiâⁿ敏感，有ê人對「䆀」早就痲痹。媠kap䆀ê判斷力，是神安tī咱體內一條非常特殊ê神經線，卻是，若欲tī台灣這塊蛀甲害害--去ê島嶼活--落-去，這條感應媠䆀ê神經，無thāu死、無抽--起-來，日子是chiok痛苦--ê；正經欲thāu--死、欲抽--起-來，做一个無感無覺ê人，有啥物意思？——哪會無意思？媠䆀只是外相啊，袂去計較媠䆀才是無分別心啊，台灣人早就超越「媠」kap「䆀」ê境界，追求--ê是「爽」，這你敢m̄知？

敢會？愛媠ê人，敢m̄是愈來愈濟？男男女女重妝閣gâu妝，保養品化妝品m̄驚無市場，整型外科美容手術當時行；愛媠是人ê天性，可惜這款天性假若kan-ta有才調發揮tī「人」家己身上，kā家己妝媠媠，總是比妝痟--ê較健康，對社會嘛算一份貢獻；無法度管人厝mài起hiah koân起hiah䆀、看板mài做甲hiah大圈hiah刺目，總--是會當決定家己衫今仔欲穿佗一軀、指甲油歡喜欲抹佗一色⋯⋯可憐ê「無力者美學」。

踏出家門，媠--ê攏是愛開錢--ê，生理場ê商品是按呢，觀光區ê天然景緻漸漸嘛欲變按呢，後日仔想欲享受海沙埔ê日頭，可能攏就愛去蹛海墘仔ê大飯店才有彼个福氣。四界行踏，䆀--êsoah攏正常--ê：溝仔溪仔無一條清氣--ê，打馬膠路是欲hō͘車駛m̄是欲予人行--ê，偷擲ê pùn-sò，續手hak-ka̍k ê飲料罐仔，亭仔跤變車庫，人行道有ná無，看板相爭伸欲到路中央，光天白日LED燈管嘛閃閃爍，頭前路、後壁巷，鐵窗對鐵窗，籠仔內ê譀古人生，有人連一个籠仔都買袂起喔，閣嫌？！

「媠」kap「䆀」，是咱家己做得來，咱人所創造。M̄知伊甸園內彼欉分別好歹ê樹，果子食落腹，會當分別好歹，敢也會當分別媠䆀？〈創世紀〉內面，上帝創造天地萬物，見創造一項一類，就有一句講「上帝看伊是好（和合本：上帝看著是好的）」。我定定想起這个「看」——創造者對受造物ê眼光——「看伊是好」，我想講，這个「好」是肯定、完成kap歡喜吧。上帝並無講「看伊是媠」。

「媠䆀無比止，愛--著較慘死」，這句俗語不止仔有鱸鰻氣，雖然明白人leh講這句話ê意思，he若真心去愛--著，才無leh管愛人仔生做媠䆀--ah。Iáu m̄-koh，tī我心內，「愛--著較慘死」soah攏會出現耶穌ê形象——想欲笑，閣知笑若像m̄-tio̍h neh，奇妙ê感覺。

媠䆀kap愛，慘死kap活命，就按呢，m̄知閣會當講啥。