李江却台語文教基金會是專業ê台語文學運動組織，tshuàn講統治者無beh做，m̄-kuh台灣人bē堪得等ê事項，kap別款基金會性質無重疊，tī統治者無重視台語各族母語ê時代，出母語雜誌、組台文讀冊會，設獎勵台語文學獎kap台文學術論文獎賞，資源有限，賞金無濟，mātī文學界、學術界hō͘有心--ê重視，tsit幾年koh增加戲劇文學ê獎項，戲劇tī文學類也是主流之一。2013年選出邱偉欣ê長篇小說《Gíng》，劇本組由林貴龍ê〈語言ê力量〉kap陳廷宣ê〈Biàn-tsih內ê春天〉得著二賞kap三賞（欠頭賞）。

阿却賞辦十外冬--ah，2012年起，想講長篇小說若無鼓勵，台語文學koh欠一塊，m̄-tsiah增設「長篇小說賞」，koh真正有志士來稿。2012年選出林貴龍ê小說，2013年選邱偉欣ê小說。邱偉欣提著德國生物科學博士學位了後，tī中研院做過博士後研究員，後--來tī大學教冊，舊年決定辭掉教職，報考高雄師範大學台灣歷史文化及語言研究所，伊表示，重做學生就是出tī本身對台灣文化、語言kap歷史ê深切關懷，伊認為語言是族群文化ê基因庫，語言ê存續關係文化ê興亡；Tī客家庄大漢ê伊，會曉講客語，mā會曉台語，這擺台文長篇小說創作，就是伊過去幾若冬來實踐母語讀寫ê成果之一。Tio̍h獎ê長篇作品《Gíng》是一篇以平埔族村落文化傳承、奮鬥、認同重建為中心ê小說，內容融入這幾年來官商勾結、土地強制徵收ê內容，呈現在地族群giám-ngē ê性命力，以及豐富多樣ê文化。

2013 年ê A-Khioh賞新設「劇本組」，入選兩篇：林貴龍，〈語言ê力量〉；陳廷宣（A-hi），〈Biàn-tsih內ê春天〉。林貴龍，2012年A-Khioh賞長篇小說獎ê得主。A-hi，講有寫詩、出一本散文集（2005），是講伊ê小說散散仔刊，tiāⁿ-tiāⁿ hō͘ lán讀著目睭光。講透ki，in lóng是小說家ê pān。

小說家寫劇本無啥mih m̄-tio̍h，mā無啥mih m̄好。跨文類寫作天公地道，欠跤手ê台語文學界，koh-khah thang鼓舞tsit-lō「試寫」風氣。講bóng講，文類ê典型小比--一-下，tsiah知戲就是戲；劇本寫作，對lán慣勢寫「字」、編意象，慣勢kō͘「字」講故事ê小說家、詩人來講，的確是挑戰。

〈語言ê力量〉ê「下齣」，用半thang光ê紗仔做幕，是規齣khah「舞台」ê一場。戲文順順仔kā讀，就知寫作動機、目的無tī舞台，tī語言「教學」――透過口白展覽語言智識；辯話骨是tsit-lō展覽兼娛樂ê手路。語彙、諺語一句仔一句「辯」--落-來，免啥mih寫劇經驗kap學問。〈語言ê力量〉hō͘ lán想著陳明仁tī BONG報、tī海翁《台語教育報》寫ê「專業行話」欄、「心適ê台語」欄，甚至月球唱片ê脫線系列爆笑劇。

〈Biàn-tsih內ê春天〉有khah小說--一-屑-仔。逐家掩名讀tsit篇，to知A-hi寫--ê。到tsit-tsūn，台文界有leh寫野球文學--ê，就A-hi一个有代表性。A-hi ê野球文本íng-íng掠「球是圓--ê」、「第九局」做critical point，描寫心理、kí-tu̍h弊案。舞台設計、「觀點」tsiâⁿ有野心；戲kám ē演--ê，是大問題。論tsit點，〈Biàn-tsih內ê春天〉m̄是小說，是影戲；Hiah-nī有野心ê「觀點」，ài kō͘鏡頭呈現，tsiah有thang ha̍h作者ê編寫動機。

劇本tio̍h獎者林貴龍是舊年阿却賞長篇小說得主，本身是室內設計師，m̄-koh長期投入台語教學kap創作；陳廷宣目前經營餐館，伊真愛野球，大學ê時讀真理大學台文系，tī hit時就開始台文寫作，tsiah無幾歲就已經得著濟濟擺文學獎項。

台灣現況真危險，台語文是台灣弱勢ê堅心守護兼創造者，希望逐家kīng力相thīn，支持台語文創作，共同延續台灣母語ê血脈。

註：《2013 A-Khioh（阿却）賞台語文學作品集》2014年4月份出版，定價$350，台語傳播總經銷，需要冊請連絡07-334-8080鄭小姐，tgtpbooks@gmail.com。）