今á日真歡喜讀tio̍h《新使者》第157期，其中ê「母語葡萄園」有六頁半（62-68頁，其中半頁是廣告），這是何等ê突破！本來約定是「每期三頁台語文」，其中有幾期因為換新編輯m̄知chit-ê約定soah斷站幾期。

 

回想起來，應該是十thóng年前，我tī一個刊物讀tio̍h張德麟牧師鼓舞大家讀寫台語文ê文章。可惜伊ê文章是用迫害咱母語ê中國話寫，m̄-koh, 內容hō͘ 我非常感動，隨時寫phoe用e-mail（hit時，我人tī波士頓）寄去請人（老大人chit-má bē記得是寄hō͘ 啥人ā）轉hō͘ 張牧師；phoe ê摘要是án-ne：「....你鼓舞大家讀寫台語文ê文章，m̄-koh，m̄-nā你家己ê文章用華語寫，你主導ê《新使者》雜誌mā無半篇台語文....《新使者》雜誌初創ê時，我有kah你做伙phah拚。Taⁿ咱koh來做伙為《新使者》ê台語文phah拚....我負責招三位「終身會員」，你負責《新使者》每期三頁台語文。....」（因為我有tī「台灣公論報」有chit-ê經驗：招50名報紙訂戶換一頁「蕃薯園—台語文專刊」。）

Hit時，我想講án-ne有可能實現「《新使者》每期三頁台語文」ê美夢。總是，一工過一工，一個月過一個月....，lóng無收tio̍h回覆。後來回台ê時，聽講張牧師重病，只好等待上帝ê引chhōa帶領。有一工，我去hit當時由雙連教會視障關懷基金會經營ê按摩站掠龍/按摩soah beh離開ê時，一個人入門to̍h叫我：「林長老，你....」。我sa無cháng teh一直摸頭殼，伊就講：「我是張德麟牧師lah。」Hit時，我確實認bē出伊ê人，伊真正病重。

 

就án-ne, 張牧師倒teh享受伊ê掠龍治療，我坐tòa邊á kah伊談天說地。當然是先談「《新使者》每期三頁台語文」ê tāi-chì, 伊一聲to̍h答應。我mā招三個終身會員：陳豐惠老師kah鄭良光長老，加上我出錢李勤岸教授出名。李勤岸教授號名叫做「母語葡萄園」；陳豐惠老師指導；我負責解決白話字亂碼ê問題。大家期待真久ê「母語葡萄園」，就án-ne ē-tàng kah大家見面。Koh有貼tī台語信望愛網站 （http://taigi.fhl.net/vcd/rotaiugbk.php?user=taigi&bid=10 ），方便愛台語文ê人線頂閱讀。

 

咱teh慶賀「母語葡萄園」十週年，mā tio̍h有kóa期待：

 

一、呼籲長老教會總會緊緊成立「台語漢字kah白話字用字一致」委員會。真chē讀者反應講：「用字花sà-sà/霧sà-sà，讀者bē ài讀台語文！」

 

像講1） “hō͘ ” ê漢字to̍h有「互」、「予」（《甘字典》讀做 “Ú”）、「乎」（《甘字典》讀做 “Hô͘”）, 2） “tio̍h” ê漢字「著」，《甘字典》讀做 “Tio̍k/Tù/Thú”, 3） “beh” ê漢字「欲」，《甘字典》讀做 “Io̍k”, 4） “thang” ê漢字「通」，《甘字典》讀做 “Thang/Thàng/Thong”, 5）“chò” ê漢字是「做」，真chē人ài寫做「作」（《甘字典》讀做 “Tsoh/Tsok”。（這可能受tio̍h華語「做」「作」仝音混用ê影響，m̄-koh台語漢字讀音無仝。）....「族繁不及備載」。

 

總講一句，蕭清芬牧師講：「咱有主體性ê台語文m̄-thang去hō͘ 漢字縛死去！」

咱台語文書寫有「漢字」，mā有「白話字/羅馬字」。現此時通用ê漢字，就是台語意思kah華語意思仝款ê漢字，咱台語文thang用；若是意思走閃ê to̍h m̄-thang用hit-ê漢字，咱來用白話字/羅馬字。

 

漢字kah羅馬字lām teh用chiah ē-tàng解決台語文ê書寫問題，tú親像日文有漢字kah「假名」lām teh用。早期ê日文mā是用真chē「借音字」（あて字），漢字「各自表述」，mā是用kah花sà-sà；漸漸有統一用字，最近hiah-ê「借音漢字」lóng改做「假名」。所以，漢羅lām teh寫漸漸成做台語文ê趨勢，咱長老教會mā tio̍h tòe時代來求進步。

 

二、早期《巴克禮白話字聖經》、《甘字典》kah《台灣教會公報》為tio̍h需要做出hiah chē對台語文有大貢獻ê文獻，m̄-koh lóng是廈門話（kah台語約90%相siâng），致使教會內kah教會外ê台語約有10%無仝。Mā有kóa台灣人tī公報ê文章用家己ê台語寫，像講 “kah” 無koh寫 “kap”。總是，大部分ê人iáu是受tio̍h頂面文獻ê影響，嘴講“kah”，文章卻寫做“kap”。

 

Hit當時mā khah無「語言學」ê基礎，像講：“tō” ≠就(chiū)。2001年哈佛大學開台語課，李勤岸教授來做老師，伊mā來波士頓台灣基督教會成人主日學教阮白話字，我就án-ne一頭栽入去台語文運動。Hit當時，我所接觸ê台語文lóng認為 “tō=就(chiū)” ；我幫忙李勤岸教授整理伊ê文集出版ê時，一開始lóng kā伊原來ê “to̍h” 改做 “tō”，伊kā我講伊最近chiah發現 “tō ≠就(chiū)”。

 

我hit當時當teh翻譯《台日大辭典》，to̍h去查《台日大辭典》，結果是：（1） [to̍h/著]＝[tio̍h/著] ê (4)(5)(6)(7)(8)(9) kah (11)ê場合mā有發chit-ê音，m̄-koh泉州系khah chē。（2） [tio̍h/著] ...... (11) (kah[就] ê (3)(4)(5)仝意思來使用) (a)表示某動作結束真久ê意思。

 

三、一個刊物ê用字mā tio̍h一致。Chit期ê「母語葡萄園」ê兩篇，lóng是我ê台語文前輩所寫ê大作，m̄-koh, 兩篇ê用字無一致是美中不足。李南衡大師可能tī讀師大碩士班ê時第一名畢業，伊有吸收現代ê語言學，我讀起來khah有現代台語味；張德麟大師可能是受tio̍h頂面所提起ê廈門話文獻ê影響真深，我讀起來khah無普遍腔台語ê語感。

語言學一直teh更新、進步，我呼籲咱台灣基督長老教會總會tio̍h重視聖經kah聖詩ê台語文書寫，m̄-thang koh kah台灣社會脫節！