逐人出世tī無同款ê時代，所tú著ê問題、挑戰kap機會也無siāng款，面對時代ê 變遷，逐人ê選擇方法，路尾也會決定伊人生ê方向kap運途。有人講：｢成功ê人chhōe方法，失敗ê人chhōe理由。｣ 人ê心思意念會左右人ê心態kap行動，也有可能變成伊是超越環境、適應環境或是寄生環境。

 

Chit 世代ê台灣青年人普遍高學歷、低薪資，理想ê頭路ò chhōe，若有thang勉強飼活家己，mā無一定敢結婚生子，mài講beh買厝置產，he是真遙遠ê 大夢。這主要是全球化經濟所產生ê普遍難題，也是咱ê時代上大ê 困境。Chóng是，俗語講：｢機會是留hō͘準備好ê人。｣ 平時認真充實學識、提升技術、培養能力、拓展好的人際關係、有應變抗壓ê韌性，當然做ㄧ個基督徒閣卡著愛有信仰ê根基kap 熱情，若án-ni，當有tú好ê 轉機，就會thang 善得生機。

 

我看一個教會青年自細漢到伊大漢，tī伊大學出業以後，家己開畫室教人畫圖，一方面經營創業生活，另外也繼續創作辦畫展想beh做藝術家圓夢。伊並無一帆風順，m̄-ku認真拍拚m̄-kiaⁿ食苦，學術兼備，慢慢也有淡薄基礎kap成就，替伊歡喜也給伊祝福。Tī chit-ê青年人ê身上，看著傳統台灣人骨力mî-nōa ê好德性，也看著新時代人類創新求變ê好功夫。當然，每一個人ê人生發展無仝款，譜寫ê故事也無像款，m̄-ku kha踏實地也才會築夢圓滿。

 

英國大文豪狄更斯（Charles Dickens, 1812～1870）tī 名著《雙城記》（A Tale of Two Cities）中講：「Che是上好ê時代，也是上bái ê時代。」咱無法度揀咱beh愛ê時代，時代無好bái，攏是上帝teh攝理。Hō͘ 咱信靠上帝勇敢壯膽，面對挑戰克服困難，｢有路，咱沿路唱歌；無路，咱蹽溪過嶺。｣一步一kha印，積極成做時代ê 創史者。