母語影音連結

 

巴克禮版 siuⁿ 歹讀？

對實際 ê 角度來看，大家讀台語聖經 kap 聖詩啟應文會感覺小可仔 khê-khê，無一定是因為九十年前 ê 巴克禮版《廈門話聖經》siuⁿ 文言、siuⁿ 困難，乃是因為干焦看漢字，煞唸袂出發音造成--ê。

 

比如講，「樹椏」欲按怎唸？「擲--落-去」--咧？目前 ê 社會現況就是：咱已經慣勢中文四角字（方塊字）ê 語言環境，所以就掠漢字做為主要 ê 方法來讀 kap 寫，這佇聖經公會1996 年出版 ê《台語漢字本聖經》上蓋明顯，一寡困難 ê 詞才加上白話字做「註解」。不過，台語漢字若無「對照」白話字，就算講是上新完成 ê《現代台語譯本聖經》（採用漢字和白話字並列），嘛是真困難讀。

 

教會成做語言 siū

所以，我對一 ê「台語平信徒」ê 立場出發，思考教會 ê 實務會當按怎來調整：第一、邀請會眾提漢羅對照版本 ê 聖經、聖詩，因為咧讀 ê 時陣，就會順 sòa 看著兩爿 ê 文字。第二、PPT 抑是週報展現 ê 方式，siāng 時加上白話字 ê 版本，hō͘  會眾參考 kap 學習。當然，閣較需要進行 ê 工作，就是開設白話字課程。

 

其實對《台灣教會公報》ê 歷史資料就會當看--著，長老教會界佇七零年代 ê 時，就有一寡教會因為逐種 ê 需要，來重新辦理白話字班，抑是族群母語 ê 培育課程。必須愛強調--ê 是：教會上重要 ê 任務毋是「語言補習班」，但是佇經過四十年了後 ê 今仔日，我認為有本土關懷認同 ê 教會會當成做「語言 siū」（『語言巢』，原文是 Te Kohanga Reo）ê 基地，這是一 ê 真符合時代方向 kap 信仰精神 ê 行動。

 

所謂「語言 siū」，是紐西蘭 Maori 人為著欲 hō͘  in ê 母語會當閣再復興，佇 1982 年所提出，並且落實 ê 概念。主要 ê 對象是針對學習語言速度上緊 ê 細漢囡仔，hō͘  in 成做「語言 siū」內面 ê「細漢鳥仔」，學習母語，並且推廣到社區 ê 逐 ê 面向，期待透過家庭、學校 kap 政府互相配合，培養出有能力使用 Maori 母語 ê 人才。現在台灣嘛有本土語言復興 ê 潮流當時行，這種對教育做起 ê 社區工作真適合教會來參考。

 

所以，「樹椏」是啥？

咱長老教會是多元文化、多族群 ê 教派，但是我無想欲佇遮討論「共同語言」、「台語文字化系統紛爭」ê 問題，嘛無認為禮拜全面華語化是唯一正路，因為我只是針對咱長老教會 ê「Hō-ló 話禮拜」提出一寡無 siāng 款但是值得咱試看覓的建議：Hō͘  教會成做本土語言 ê「語言 siū」。

 

最後，嘛是愛講--一下，文章上頭前講--著 ê 彼兩 ê 詞分別唸做 " chhiū-oe "（樹椏）kap " tàn--lo̍h-khì "（擲落去）；巴克禮 ê 版本 kā「樹椏」翻譯做「一叢樹枝」，我顛倒閣愛掀巴克禮譯本，才通知影現代台語譯本 ê「樹椏」所講--ê 是咧指啥物，真正有夠趣味。

 

延伸閱讀：

1. 吉娃詩．叭萬 Ciwas Pawan，2006，〈從紐西蘭毛利族的語言巢看臺灣的原住民母語教學〉。《臺灣國際研究季刊》2(1): 163-184。