聖詩實在是上帝賞賜予（hō͘）人類真好的禮物，佇聖詩內面往往因為優美的旋律、古雅的押韻 kap 心適的鬥句，成做人隨時會當開聲吟唱分享的歌曲；閣因為作者充滿豐富的性命見證，hō͘ 人佇詩歌的意境內面，真實感受上帝無限的疼。所以，我真愛吟聖詩。下面欲來分享一首予人唱著會笑 bi-bi，ná 唱 ná tiô跳、jú 唱 jú 快樂的幸福進行曲：聖詩 611 首〈隨主的人有幸福〉。
這首詩歌曲調真輕快，歌詞活潑，充滿信仰的性命力；特別是雖罔性命 bat tú 著困苦絕望、行過死蔭山谷，iû-goân 因為堅持跟隨主、擒住（khîⁿ-tiâu）主來得勝的信仰長輩，in 對這首詩歌攏真感動，常常佇吟詩 o-ló ê 時心神得著恢復，會使講是一首性命 kap 信仰連結的見證詩歌。咱先做陣來欣賞歌詞：
1.
隨主的人有幸福，若準遊賞真快樂；
逐時刻謳咾吟詩，滿心平安真得意。
【複歌】
會得快樂，隨主的人快樂，主的快樂無通比；
心底趒跳大歡喜，擒住主呣通放離，
就得快樂，永遠通得主快樂。
2.
隨主的人有幸福，卡贏苦痛得快樂；
得主福音入我心，嘴𣍐禁得開聲吟。（複歌）
3.
隨主的人有幸福，雖然行烏暗山谷；
若隨耶穌的腳步，會得主給咱導路。（複歌）
規首詩用幸「福」、快「樂」、山「谷」、腳「步」、導（chhōa）「路」，開嘴唱歌的「ok」韻、「o͘」韻，以及心內歡喜充滿笑容的「i」韻、「im」韻，（吟「詩」、「得意」，入我「心」、開聲「吟」），唱出對上帝榮光 tù 現，有限的人面對無限的上帝，逐時刻 tiàm 佇身邊 teh 陪伴的感謝，無論得時無得時，攏是歡喜唱歌、o-ló 無 soah 的彼款心情。
這首歌用三層次來表達隨主的人真幸福，佇每一節的複歌講出保持幸福的mê-kak，就是「擒住主 m̄ 通放離」。第一個層次用遊賞的快樂來比喻隨主的人，幸福的旅程行 lo̍h--khì，逐時刻因為順服隨主行，免驚惶，沿路謳咾吟詩、滿心平安真得意。第二個層次用有主福音 tiàm 佇心內，會當 khah 贏苦痛，來獻上對主的頌讚 kap o-ló。第三個層次提醒人 bo̍h-tit 誇口目睭前的幸福，因為隨主的人mā 是會軟弱、有烏暗山谷擋佇頭前的時陣，仝款堅心倚靠主耶穌，相信主 kā咱導路，因為按呢，無論順境逆境，攏因為有主真幸福！
幸福的定義，逐人無相 siâng。有人認為得著世間 ê 一切就是幸福，有人認為食著 ka-kī 上愛食的物就是幸福，有人認為 kap 家己 kah 意 ê 人做伙就是幸福，有 ê 人認為逐 kang 閒仙仙，m̄ 免為生活奮鬥就是幸福。Chóng--sī，若是身邊真chē 代誌咧 tak 纏，心神有時 tú 著操煩 peh 腹致到鬱卒傷悲、m̄ 知影欲按怎行--lo̍h-khì，抑是面對死失陷害、病痛折磨、經濟艱苦、憂傷流目屎的時，咱豈猶原歡喜告白：「隨主的人真幸福？」Ho̍k 歌一遍閣一遍歡喜分享：「會得快樂，隨主的人快樂，主的快樂無通比；心底趒跳大歡喜，擒住主呣通放離，就得快樂，永遠通得主快樂。」心底 tiô 跳，這是 jōa-ní-á 活潑的畫面！Hō͘ 人用 tiô跳的音符去吟唱、去經歷對咱心底歡歡喜喜 ê 告白：「隨主的人有幸福」！
詩篇一四四 15： 「享受此款景況的子民真有福氣！」無論 tī 啥款境遇，攏因為上帝同在，心內有平安來歡喜。這款的人生就是幸福！
|