最近感覺有愈來愈濟人 teh 講台語，媒體 mā 攏 teh 報 tùi 美國轉來的電子公司頭家問記者：「Kám 會曉講台灣話？」社會袂輸開始 teh 流行講台語。毋過，文化留存、語言傳承若是干焦欲靠流行是無夠額--ê。

 

我細漢佇宜蘭庄跤大漢，無論日常生活抑是去教會禮拜，攏誠自然講台語。會 kì-tit 大學佇台北讀冊 ê 時，若去病院實習，阿公、阿媽攏謳咾我台語講了真好！佇台北 ê 生活，我無論 tú-tio̍h 啥物人 tō 會用華語應伊，干焦轉去宜蘭，才會開喙講台語。彼當時，我家 mā 感覺足怪奇，我會有這種自然的反應。確實，環境會影響人對語言的選擇，我發現 kap 家己人講，台語是足親切--ê。

 

我過去佇幼稚園做工課，bat 聽老師分享，伊佇學生面前，若是欲共其他老師講秘密，tio̍h-ài 用台語。Tang-sî 開始，咱 ê 母語煞變做干焦大人 teh 講 nā-tiāⁿ。今仔日無論是佇學校抑是佇厝內，序大人 kap 囡仔講話，家己 mā 直接轉做華語，今仔日的大環境完全是華語較強勢。

 

成做全台語家庭

本底，我家己 mā 無意識 kap 囡仔講台語，是有一工，阮兜去濟南教會參加婚禮，拄著牧師 ê 細漢查某囝攏講台語，彼當時，我 ê 想法是足欣羨伊有法度講母語。對 án-ni，我轉去就下願，開始有意識對我一歲 ê 大漢囝講台語。 一直到第二胎出世矣，阮兜有機會搬去枋橋，總算會當去彼間牧師 ê 教會上主日學，我也期待予囡仔閣較濟台語環境、教會囡仔伴。會 kì-tit 彼當時，牧師娘共我講：「因為有囡仔袂曉講，干焦會使台語一半、華語一半。 」Chit-má 回想起來，才發覺這台語比例已經有夠懸！莫講欲揣有台語 ê 主日學是偌爾無簡單--ah！

 

毋但想欲 hō͘ 囡仔會曉講台語，koh  希望 in kap 阿祖 ê 關係，會使透過講仝語言，予感情 koh 較好；mā  向望 tùi 會曉講母語來熟 sāi 家己的族群，認同這塊咱所生活 ê 土地。

 

這陣，阮已經有三 ê 細漢囡仔，日常就是用台語來生活、學習萬項事。三个囡仔平常時鬥陣出門已經真 hiáⁿ-ba̍k，in 又閣講台語，聽--著的人攏真 o-ló。毋過 mā 定定予人問：「為啥物欲刁工 kap 囡仔講台語？」這題已經毋免我回答--ah，阮囝會應--伊：「我是台灣人，我講台語！」

 

對參加到創立新的共學團

Tī 台北有一陣阿母誠骨力咧傳承台語，毋但 tùi 囡仔講，閣成立共學團、協會，來為囡仔 kēng 一个全台語的環境。Tòa 佇台北 ê 時，阮定定去共學團揣囡仔伴𨑨迌，做伙 sńg koh 誠自然講台語交流。毋過，阮 tùi 舊年 8 月搬來宜蘭，囡仔去讀冊了後，in 佇幼稚園長時間學華語 ê 速度是足緊--ê，而且佇庄跤 ê 台語活動、資源變少，囡仔 mā 愈來愈濟台語濫華語 teh 講 ê 情形；𤆬囡仔去親子館𨑨迌，發現攏無家長 teh kap 囡仔講台語。

 

對按呢，我決心欲佇宜蘭招佇學齡前參加 ê 台語親子共學團，親像阮佇台北參加--ê 仝款，除了 chhōe 著囡仔伴，mā 希望予 koh 較濟家長會使有意識來對細漢囡仔講台語，達成傳承母語的目標。

 

到 taⁿ，經過兩擺 ê 活動，已經有 17 組家庭、大人囡仔超過 20 人來參與，其中甚至有完全袂曉 ê 囡仔來學。Chóng--sī，欲做召集人無蓋簡單，想欲維持全台語的共學環境，需要定定提醒大人，將家己慣勢用的語言轉--tńg-lâi，若想欲予共學團久長，tio̍h-ài 想欲按怎經營。按呢 ê 共學，予我想著過去參與大專長青團契 ê 經驗，mā 仝款需要開時間來思考、討論，siāng-sî koh 愛顧課業，這陣變做是 teh 顧家庭。

 

共學團類似大專團契，佇新的環境建立新的關係（台語同伴家庭），鬥陣服事、分工（用台語分享家己 ê 專業智識）來予彼此成長，攏是為著咱相仝的信念（傳承台語）。

 

有人 bat 問我這个共學團敢有福音的性質？目前看是無，毋過我誠希望有。對細漢佇教會生活，聽慣勢用台語唱聖詩、讀聖經、聽講道，牧師 koh 教阮白話字，遮爾濟的教會生活記持，我偌爾希望阮囝 mā 有仝款 ê 經驗，會當用本地 ê 語言來敬拜上帝！按照chit-má 的情勢，若有一日，少年人攏聽無台語，台語對教會 ê 禮拜消失，閣無人會曉唱我上佮意、上媠 ê 台語詩歌。

 

台語帶來的好消息

耶穌 tòa--來的福音予受掠的人會得解放，予 chhiⁿ-mî--ê 會得著閣光，這是拯救人的好消息。
 

毋知台語對台灣人來講敢毋是福音？予本地人認同家己 ê 族群，予外國人會使分別中國 kap 台灣 ê 無仝，hoān-sè 是咱國家的好消息。
 

無論是 kap 人抑是教會，我 tùi 講台語有滿腹的感情。向望逐家來鬥陣行台語路，傳承咱 ê 話。現時開喙講台語 tō 猶 ē-hù，毋免煩惱家己台語無好，就 ài開始講才會變 gâu--lah！