" Lí beh khì Tâi-lâm tha̍k chheh--o͘h, án-ne ē-sái khì Tâi-lâm Tāi-choan tiong-sim--o͘h ! " Í-Keng sī tē saⁿ ê lâng án-ne kā góa pò--ah. Hit kang, góa sūn Tāi-ha̍k-lō͘ ti̍t-ti̍t kiâⁿ, lâi-lâi-khì-khì ê chhia, choân-sin ê jîn-seng tē-phiau sut-kòe ba̍k-bóe, góa lâi kàu bih-tī siang-chhe lō͘ -kháu piⁿ--á ê âng-chng-lâu-á.
「你欲去台南讀冊喔，án-ne 會使去台南大專中心喔！」已經是第三 ê 人 án-ne kā 我報矣。彼工，我順大學路直直行，來來去去 ê 車、全新 ê 人生路標 sut 過目尾，我來到 bih 佇雙叉路口邊仔 ê 紅磚樓仔。
Goân-té siūⁿ-kóng lâi chi̍t nn̄g kái, hó tńg-khì kau-tài tō hó, siūⁿ-bē-kàu chit tòng âng-chng-lâu-á soah chiâⁿ-chò " goán-tau "―tī góa lī-khui kò͘-hiong ê chheng-liân sî-tāi, ín-chhōa góa jīn-bat ka-kī, jīn-bat sìn-gióng ê só͘ -chāi. Saⁿ nî ê tāi-choan seng-oa̍h nā-chhiūⁿ chi̍t-tōaⁿ lú-thêng, tī chia góa siūⁿ-beh kap tāi-ke hun-hióng kúi ê hong-kéng.
原底想講來一兩 kái 好轉去交代就好，想袂到這棟紅磚樓仔 soah 成做「阮兜」——佇我離開故鄉 ê 青年時代，引 chhōa 我認識家己、認識信仰 ê 所在。三年 ê 大專生活若像一段旅程，佇 chia 我想欲 kap 逐家分享幾 ê 風景。
1. Ha̍k-seng chū-chú ê sìn-gióng seng-oa̍h——tui chhōe, koan-hoâi, hêng-tōng
第一：學生自主 ê 信仰生活——追揣、關懷、行動
Tâi-lâm Tāi-choan ê SCM cheng-sîn, kó͘ -lē ha̍k-seng m̄-nā tui-chhōe sìn-gióng chin-lí, koh ài koan-hoâi siā-hōe, ha̍k-si̍p chiâⁿ -chò siā-kûn ê ho̍k-sāi-chiá. Tiong-sim ē kui-oe̍h kui-nî-thàng-thiⁿ ê sū-kang, iau-chhiáⁿ ha̍k-seng chham-ú tiû-pī, hō͘ goán hoat-hui chhòng-ì, tī seng-oa̍h lāi-bīn chhiau-chhōe oa̍h-tāng ê chú-tê.
台南大專 ê SCM 精神，鼓勵學生 m̄-nā 追 chhōe 信仰真理，koh 愛關懷社會，學習成做社群 ê 服事者。中心會規劃規年迵天 ê 事工，邀請學生參與籌備，予阮發揮創意，佇生活內面 chhiâu-chhōe 活動 ê 主題。
Chhiūⁿ Sèng-tàn lé-pài, sī tùi su-tong-sî ê siā-hōe gī-tê chhut-hoat, lâi hoán-séng Iâ-so͘ kàng-seng tùi goán ê ì-gī. Chham-ú chiah-ê sū-kang, hō͘ góa ha̍k-si̍p tio̍h kui-oe̍h oa̍h-tāng, kái-koat būn-tê, kap chham lâng ha̍p-chok ê lêng-le̍k. Kèng-ka hō͘ góa ū ióng-khì kiâⁿ chhut siàu-liân-lâng ê kha-pō͘ , khì gián-kiù, koan-sim sin-khu-piⁿ ê it-chhè, pau-koat sìn-gióng, ha̍k-gia̍p, kap jîn-chè.
像聖誕禮拜，是對斯當時 ê 社會議題出發，來反省耶穌降生對阮 ê 意義。參與 chia-ê 事工，予我學習 tio̍h 規畫活動、解決問題、kap 參人合作 ê 能力。更加予我有勇氣行出少年人 ê 腳步，去研究、關心身軀邊 ê 一切，包括信仰、學業 kap 人際。
2. Siōng-tè ê thiàⁿ, kì-chài tī sèng-keng——Tâi-lâm cha-keng-pan
第二：上帝 ê 疼，記載佇聖經——台南查經班
" Goán tī thiⁿ--nih ê Pē... " Saⁿ hòe ê sî-chūn, góa tō o̍h ē-hiáu iōng Tâi-gí pōe Chú ê Kî-tó-bûn. M̄-koh, tī bô͘ -hóng--lâi ê sìn-gióng gí-giân pōe-āu, góa kám chin-chiàⁿ jīn-bat hit ūi Siōng-tè--ah ?
「阮佇天裡 ê 父......」，會記得三歲 ê 時陣，我就學會曉用台語背主禱文。毋過，佇模仿--來 ê 信仰語言背後，我敢真正認識彼位上帝--ah？
Tâi-lâm Tāi-choan kó͘ -lē ha̍k-seng tùi sìn-gióng thê-chhut būn-tê, chò-hóe thó-lūn. Tùi mn̄g " ūi-siáⁿ-mi̍h " ê kòe-thêng tiong, khì chhiau-chhōe Siōng-tè kap góa ê koan-hē. Chit khoán liān-si̍p, sī tùi cha-keng khai-sí.
台南大專鼓勵學生對信仰提出問題，做伙討論，對問「為啥物」ê 過程中，去 chhiau-chhōe 上帝 kap 我 ê 關係。這款練習，是對查經開始。
Kū-nî Cha-keng-pan chò-hóe tha̍k Chhòng-sè-kì, siàu-liân Ngá-kok ê kò͘-sū. Goán thó-lūn tio̍h：kap Ngá-kok sio-ián ê lâng tàu-té sī siâng ? Ūi-siáⁿ-mi̍h in beh sio-ián ? Tī bô phōaⁿ ê àm-mê, hit-ê lâng khó-lêng sī thiⁿ-sài, á-sī kòe-khì bô sêng-si̍t ê ka-kī, mā khó-lêng sī Siōng-tè.
舊年查經班做伙讀《創世記》少年雅各 ê 故事。阮討論 tio̍h：kap 雅各相偃 ê 人到底是誰、為啥物 in 欲相偃？佇無伴 ê 暗暝，彼 ê 人可能是天使，抑是過去無誠實 ê 家己，mā 可能是上帝。
I " chú-tōng " chìn-ji̍p Ngá-kok phiau-po̍k ê sèⁿ-miā, táⁿ-kek-- i, thê-chhéⁿ i khì bīn-tùi ka-kī sim-lāi ê chhiong-tu̍t kap nńg-chiáⁿ. Thiⁿ-kng ê sî, Ngá-kok tì-kak tio̍h goân-lâi i kap Siōng-tè sio-tú--ah.
伊「主動」進入雅各漂泊 ê 生命，打擊--伊，提醒伊去認識家己心內 ê 衝突 kap 軟汫。天光 ê 時，雅各智覺 tio̍h 原來伊 kap 上帝 sio-tú--矣。
Thu̍t-lûn ê tōa-thúi, sī thòng-khó͘ kap chiok-hok siāng-sî lâu--lo̍h-lâi ê kì-hō, beh phōaⁿ i chi̍t-sì-lâng. Hit-sî, góa ê ba̍k-sái hiám-hiám-á lâu--lo̍h-lâi. Góa kap Ngá-kok kāng-khoán sī " tē-saⁿ tāi " Ki-tok-tô͘, koh sī ban-á kiáⁿ.
Thu̍t-lûn ê 大腿，是痛苦 kap 祝福 siāng 時留落 ê 記號，欲伴伊一世人。彼時，我 ê 目屎險險仔流--落-來。我 kap 雅各 kāng-khoán 是「第三代」基督徒，閣是屘仔囝。
Lâng kóng, " Siōng-tè ū kiáⁿ bô sun", hiān-chhú-sî ê góa, iáu bô chhiūⁿ sī-tōa ū chhim-khek ê sìn-gióng keng-le̍k, beh an-chóaⁿ siong-sìn hit-ūi bat chhōa in kiâⁿ-kòe hong-éng ê Siōng-tè, mā ē chiâⁿ-chò góa ê Siōng-tè--leh ?
人講：「上帝有囝無孫」，現此時 ê 我，猶無像序大(sī-tōa)有深刻 ê 信仰經歷，欲按怎相信彼位 bat chhōa in 行過風湧 ê 上帝，mā 會成做我 ê 上帝--咧？
Bīn-tùi sim-lāi ê chhiong-tu̍t, góa tō chhiūⁿ Ngá-kok kāng-khoán, ē tô-cháu, ē giâu-gî；m̄-koh,tng góa kiâⁿ-kòe chi̍t-ê o͘-àm-mê, oa̍t-thâu khòaⁿ góa só͘ keng-le̍k ê it-chhè, kám m̄ sī Siōng-tè chhin-sin lâi táⁿ-kek--góa, koh pôe-phōaⁿ góa kiâⁿ--kòe--ê ?
面對心內 ê 衝突，我就像雅各 kāng-khoán 會逃走、會 giâu-gî；毋過當我行過一 ê 暗暝，oa̍t 頭看我所經歷 ê 一切，敢毋是上帝親身來打擊--我，閣陪伴我行--過-ê？
Chiū án-ne, goán chò-hóe tùi Sèng-keng ê kò͘-sū, tha̍k-tio̍h ka-kī ê sèⁿ-miā kò͘-sū, koh chìn-chi̍t-pō͘ hoán-séng góa kap Siōng-tè ê koan-hē. Che tō-sī góa ê chit-tōaⁿ tāi-choan lú-thêng, siōng tiōng-iàu ê ha̍k-si̍p.
就 án-ne，阮做伙對聖經 ê 故事，讀 tio̍h 家己 ê 性命故事，閣進一步反省我 kap 上帝 ê 關係。這就是我 ê 這段大專旅程中，上重要 ê 學習。
3. Sìn-gióng si̍t-chiān——2024 sìn-gióng pôe kun iâⁿ
第三：信仰實踐——2024 信仰培根營
Cha-keng pan soán tha̍k ê keng-chat, sī ūi " Sìn-gióng pôe-kun-iâⁿ " lâi pī-pān. Keng-kòe chi̍t ha̍k-kî ê hùn-liān, hioh-joa̍h tō lûn-tio̍h tāi-ha̍k-seng chhut jīm-bū, khì chhōa chheng-siàu-liân tha̍k keng--lo͘h!
查經班所讀 ê 經節，是為「信仰培根營」來備辦。經過一學期 ê 訓練，歇熱就輪 tio̍h 大學生出任務，去 chhōa 青少年讀經--囉！
Iōng sì kang ê iâⁿ-tūi, chò-hóe tha̍k Chhòng-sè-kì 22-33 chiuⁿ, chú-tê hō-chò " 請問這裡給約嗎？ " Chit-pái góa tī kok-tiong cho͘, khai-sí chìn-chêng ū-iáⁿ sī chiok kāu-chhau-hoân, kiaⁿ kap gín-á ū " tāi-ko͘ ", kiaⁿ in tha̍k-keng chē-bē-tiâu, siōng kiaⁿ--ê sī：goán kám-ē bô-hoat-tō͘ hō͘ in hó-ê thé-giām ?
用四工 ê 營隊，做伙讀創世紀22-33章，主題號做：『請問這裡給約嗎？』這 pái 我佇國中組，開始進前有影是足厚操煩，驚 kap 囡仔有「代溝」，驚 in 讀經會坐袂牢，上驚--ê 是，阮敢會無法度予 in 好 ê 體驗？
Ti̍t-kàu chèng-sek khai-sí góa chiah liáu-kái, m̄-bián siuⁿ chhau-hoân, in-ūi che sī Siōng-tè ê kang, I ē chhin-sin ín-chhōa. Tng goán kó͘-lē in thê-būn thó-lūn ê sî, chi̍t ūi kok-tiong-seng ê būn-tê hō͘ góa lâu-lo̍h chiâⁿ chhim ê ìn-siōng：" Ūi-siáⁿ-mi̍h Ngá-kok ē it-ti̍t thó chiok-hok ? Tō í-keng thó-tio̍h chiâⁿ chē--ah, kám iáu bô-kàu-gia̍h ? "
直到正式開始我才了解，人毋免傷操煩，因為這是上帝 ê 工，伊會親身引 chhōa。當阮鼓勵 in 提問討論 ê 時，一位國中生 ê 問題予我留落真深 ê 印象：「為啥物雅各會一直討祝福？就已經討 tio̍h 真濟--矣，敢猶無夠額？」
Sī--ah, Í-sek-lia̍t bîn-cho̍k it-ti̍t kā Ngá-kok Khòaⁿ-chò sìn-gióng bô͘ -hoān, m̄-koh goán khòaⁿ--tio̍h ê Ngá-kok sī chiah-ni̍h kan-khiáu, koh phiàn koh chhiúⁿ, koh chhek-tok Siōng-tè, soah-sī siáⁿ-mih chiok-hok lóng beh lia̍h-tiâu-tiâu, lán thái-ē kā chit-khoán lâng khòaⁿ-chò sìn-gióng bô͘-hoān neh ?
是啊，以色列民族一直共雅各看做重要 ê 信仰模範，毋過阮看--tio̍h ê 雅各是 chiah-ni̍h 奸巧，閣騙閣搶，閣測度上帝，soah 是啥物祝福攏欲掠牢牢，咱 thái 會 kā 這款人看做信仰模範--neh？
Keng-kòe thó-lūn, góa sim-lāi chin kám-tōng. Ngá-Kok ê hêng-siōng kám m̄ sī leh kóng Í-sek-lia̍t-lâng ? Chá-chêng seng-oa̍h tī chiàn-cheng, chu-goân khiàm-khoeh ê khoân-kéng, in sī jōa-ni̍h-á siūⁿ-beh tit-tio̍h chiok-hok, kiû chi̍t-ê an-ún ê jîn-seng, hong-siu ê thó͘-tē ?
經過討論，我心內真感動。雅各 ê 形象敢毋是咧講以色列人？早前生活佇戰爭、資源欠缺 ê 環境，in 是偌爾仔想欲得 tio̍h 祝福，求一 ê 安穩 ê 人生、豐收 ê 土地。
Nāg óa, góa kám m̄-sī hiān-tāi ê Ngá-kok, bīn-tùi siā-hōe ê kî-thāi, sêng-tióng ê hoân-ló, khòaⁿ-tio̍h pa̍t-lâng cheng-chhái ê jîn-seng, góa mā chiok siūⁿ-beh ū koh-khah chē ê un-sù kap le̍k-liōng, soah éng-oán tùi ka-kī bô se̍k-sāi, bô boán-ì, sīm-chì bô khòaⁿ-tio̍h Siōng-tè í-keng khǹg-tī góa sin--siōngê chiok-hok ?
若我，我敢毋是現代 ê 雅各，面對社會 ê 期待、成長 ê 煩惱、看 tio̍h 別人精彩 ê 人生，我 mā 足想欲有閣較濟 ê 恩賜 kap 力量，soah 永遠對家己無熟似、無滿意，甚至無看 tio̍h 上帝已經囥佇我身--上 ê 祝福？
Tùi chhōa gín-á cha-keng ê kòe-thêng tiong, góa thé-hōe--tio̍h, goán sī hō͘-siong tòa-niá, chò-hóe sêng-tióng--ê, in khòaⁿ--tio̍h ê būn-tê kap siūⁿ-hoat, lóng hō͘ góa tùi keng-bûn ê sióng-siōng ná ke-thiⁿ.
對 chhōa 囡仔查經 ê 過程中，我體會 tio̍h，阮是互相帶領、做伙成長--ê，in 看--著 ê 問題 kap 想法，攏予我對經文 ê 想像愈加添。