Tī Tâi-lâm Tāi-choan ê bûn-hòa lāi-té, nî-hòe, pōe-kéng kap sìn-gióng keng-le̍k lóng bô leh hun kúi nî-kip, nái-sī kó͘-lē  tāi-ke chū-iû su-khó, an-sim kóng-ōe. 

 

佇台南大專 ê 文化內底，年歲、背景 kap 信仰經歷攏無咧分幾年級，乃是鼓勵大家自由思考、安心講話。

 

Siūⁿ-tio̍h Tâi-oân ê kàu-io̍k, it-ti̍t chhui gín-á hiòng-chiân kiâⁿ, soah chin-chió kó͘-lē in khì thiaⁿ ka-kī ê sim-siaⁿ;  siā-hōe-siōng mā ū chē-chē lâng in-ūi khoân-kéng, á-sī koân-le̍k ap-pek, bô-hoat-tō͘  tián-hiān siōng chin-si̍t ê bô͘-iūⁿ.

想 tio̍h 台灣 ê 教育，一直催囡仔向前行，soah 真少鼓勵 in 去聽家己 ê 心聲；社會上 mā 有濟濟人因為環境，抑是權力壓迫，無法度展現上真實 ê 模樣。

 

Goán tin-sioh chiah-ê siaⁿ-im, chiah tio̍h chi̍t pún chheh,  chi̍t-tōaⁿ keng-bûn, chi̍t ê Workshop, lâi hun-hióng pí-chhú ê kò͘-sū,  mā koan-sim siā-hōe siū ap-pek ê kak-lo̍h.

 

阮珍惜遮 ê 聲音，藉 tio̍h 一本冊、一段經文、一 ê 工作坊，來分享彼此 ê 故事，mā 關心社會受壓迫 ê 角落。

 

Chhiūⁿ goán ū pān-kòe sèng-pia̍t kò͘-sū tián-lám, Í Pa chiàn-cheng kî-tó-hōe, mā ū thê-kiong sim-lí-chu-siong ê pó͘-chō͘, tong-jiân mā mî-nōa  tī chheng-liân  bo̍k-ióng ê gī-tê.

 

像阮有辦過性別故事展覽、以巴戰爭祈禱會、mā 有提供心理諮商 ê 補助，當然 mā 綿爛佇青年牧養 ê 議題。 

 

Bô-kāng sè-tāi chi-kan, khoân-kéng kap koan-liām to bô sio-kâng, ū-sî-chūn khak-si̍t ē thiaⁿ-bô pí-chhú ê siaⁿ-im. Chheng-liân  khó-lêng ū pōe-kut ê siūⁿ-hoat, chiâⁿ tio̍h-kip beh thè sè-kài pó͘-phòa-bāng. Mā khó-lêng bīn-tùi ka-kī kap sè-kài kè-ta̍t-koan ê chhiong-tu̍t, koh ài chhau-hoân ha̍k-gia̍p kap bī-lâi, in iáu bong-bē-chheng ka-kī ê kak-sek,  chē-chē sim-lāi-ōe kóng bē chhut chhùi.

 

無 kāng 世代之間，環境 kap 觀念攏無相 kâng，有時陣確實會聽無彼此 ê 聲音。青年可能有背骨 ê 想法，就急欲替世界補破網。mā 可能面對家己 kap 世界價值觀 ê 衝突，閣愛操煩學業 kap 未來，in 猶摸袂清家己 ê 角色，濟濟心內話講袂出嘴。

 

Tāi-choan thê-kiong tāi-ke an-sim kóng-ōe ê khong-kan, chiap-la̍p chheng-liân ê pōe-kut kap giâu-gî, tiōng-sī in tùi sèⁿ-miā thê-chhut ê múi chi̍t ê būn-tê,  iau-chhiáⁿ i kè-sio̍k khì chhiau-chhōe sim-lāi chin-si̍t ê siaⁿ-im.

 

大專提供大家安心講話 ê 空間，接納青年 ê 背骨 kap giâu-gî，重視 in 對性命提出 ê 每一 ê 問題，邀請伊繼續去 chhiau-chhōe 心內真實 ê 聲音。

 

Bô-chhò, tō kap cha-keng kāng-khoán, kó͘-lē gín-á tùi keng-bûn thê-chhut gî-būn, thàu-kòe mn̄g "ūi-siáⁿ-mi̍h" ê kòe-thêng, khì jīn-bat ka-kī ê sim-su, mā jīn-bat sim-lāi Siōng-tè ê bô͘-iūⁿ.

 

無錯，就 kap 查經 kāng-khoán，鼓勵囡仔對經文提出疑問，透過問「為啥物」ê 過程，去認識家己 ê 心思，mā 認識心內上帝 ê 模樣。

 

Só͘-í, nā mn̄g góa Tāi-choan sī siáⁿ-mi̍h khoán ê só͘-chāi, góa ē kóng, i sī tiōng-sī múi-chi̍t-ê lâng ê siaⁿ-im ê "thoân-khè".

所以，若問我大專是啥物款 ê 所在，我會講，伊是重視每一 ê 人 ê 聲音 ê「團契」。 

 

Tâi-lâm tāi-choan tùi góa ê ì-gī：kap chin-si̍t ê ka-kī sio-tú, kap Siōng-tè sio-tú

台南大專對我的意義：kap 真實的家己相拄、kap 上帝相拄

Chiàⁿ-chiàⁿ sī chheng-liân sî-kî, chit-tōaⁿ ē-tàng chū-iû iû-sióng sè-kài, thàm-thó jîn-seng ê nî-hòe, "Chū-ngó͘ thóng-ha̍p hūn-loān(Identity vs. Role Confusion)" ê thiau-chiàn mā lîm-kàu goán. Góa sī siáⁿ-mih lâng, bī-lâi  beh kiâⁿ  siáⁿ-mi̍h lō͘,  tú-tio̍h oh-tam-tng ê tāi-chì beh an-chóaⁿ pâi-kái?

 

正正是青年時期，這段會當自由遊賞世界、探討人生 ê 年歲，「自我統合混亂（Identity vs. Role Confusion）」ê 挑戰 mā 臨到阮。我是啥物人、未來欲行啥物路、tú-tio̍h 僫（oh）擔當 ê 代誌欲按怎排解？

 

Tī chiah bô pêng-chēng ê nî-hòe, sī Tâi-lâm Tāi-choan ê thoân-khè seng-oa̍h pôe-phōaⁿ góa kiâⁿ--kòe.  Tī cha-keng ê kòe-thêng, ín-chhōa góa khì hoán-séng：" Siōng-tè beh chiah-tio̍h hiān-chāi ê chhú-kéng, kā góa kóng siáⁿ-mi̍h."

 

佇這無平靜 ê 年歲，是台南大專 ê 團契生活陪伴我行--過。佇查經 ê 過程引 chhōa 我去反思；「上帝欲藉現在 ê 處境，kā 我講啥物。」

 

Lâi-kàu chia ê tē saⁿ nî, góa tau̍h-tau̍h-á bêng-pe̍k, sìn-gióng sī su-iàu keng-le̍k--ê.  I m̄-nā sī tùi sèng-keng jī-bīn ê siong-sìn, m̄-sī ū iūⁿ khòaⁿ iūⁿ ê hêng-ûi, sī hó-hó-á khì thiaⁿ ka-kī sim-lāi ê siaⁿ-im, tòa ka-kī siōng chin-si̍t ê nńg-chiáⁿ, tńg-lâi  kàu Siōng-tè bīn-chêng. Góa siūⁿ, pē-bú ê siōng-tè, í-keng chiām-chiām chiâⁿ-chò góa ê Siōng-tè--ah.

 

來到遮的第三年，我 tau̍h-tau̍h-á 明白，信仰是需要「經歷」--ê。伊 m̄-nā 是對聖經字面 ê 相信，毋是有樣看樣 ê 行為，是好好仔去聽家己心內 ê 聲音、帶家己上真實 ê 軟汫，轉來到上帝面前。我想，父母的上帝，已經漸漸成做我的上帝矣。

 

Góa tiāⁿ-tiāⁿ leh siūⁿ, chit keng tiām-tiām hoat-kng beh 60 nî  ê âng-chng-lâu-á, m̄-sī só͘-ū ê lâng lóng ē chù-ì--tio̍h--ê, jî-chhiáⁿ ta̍k-nî lóng ū lâng ji̍p--lâi, mā ū lâng ē lī-khui.  Nā án-ne,  Siōng-tè chhōa góa lâi-kàu chia, ū siáⁿ-mih chí-ì--leh?

 

我定定咧想，這間 tiām-tiām 發光欲 60 年的紅磚樓仔，毋是所有人攏會注意--tio̍h- ê，而且逐年攏有人入--來，mā 有人會離開。若 án-ne，上帝 chhōa 我來到遮，有啥物旨意--咧？

 

Siūⁿ kàu chia, góa hiông-hiông siūⁿ-tio̍h Sèng-si 540 siú： "Chú teh kiò lán-lâng chòe chin-kng ê teng,……chit sè-kan ū o͘-àm, ……lán tio̍h chhiō i kng, chi̍t lâng chi̍t kak". Sī thiàⁿ hō͘ goán chū-chi̍p chò chi̍t hóe, iōng bô-kâng ê sèⁿ-miā kò͘-sū hō͘-siong bián-lē；mā chò-hóe koan-sim chit-ê siā-hōe,  chhiau-chhōe goán ē-tàng tī siáⁿ-mih só͘-chāi, kiâⁿ chhut thiàⁿ ê hêng-tōng. Tī goán sòaⁿ--khì liáu-āu, iā tō ài chiong só͘ siū ê chō-chiū, chah khì goán ê āu chi̍t chām.

想到 chia，我 hiông-hiông 想 tio̍h 聖詩540首：「主啲叫咱人做真光ê燈；……此世間有烏暗，……咱 tio̍h 照伊光，一人一角。」是疼予阮聚集做一伙，用無 kâng ê 性命故事互相勉勵；mā 做伙關心這 ê 社會，chhiau-chhōe 阮會當佇啥物所在，行出疼 ê 行動。佇阮散--去了後，也就愛將所受 ê 造就，chah 去阮的後一站。