會記得是tī 2007年ê一工，我去Arlington ê賴府拜訪ê時，賴長老hō͘ 我看koh借我讀華語版kah原文日文版ê《陳夫人》。我讀了後，發見這是一本基督教ê小說，是我一直teh走chhōe-.ê。Hit當時，我熱愛台語，koh mā真愛日語；就án-ne決定beh kā它譯做台語。

 

過無幾工，我koh去拜訪賴長老，kā in夫婦講明我決定beh kā它譯做台語。In真歡喜，to̍h kā我講：Chit本小說是作者庄司總一以賴長老娘(劉慶理姊) ê老母做《陳夫人》ê mo͘-té-luh所寫ê。賴長老娘講作者ê小妹庄司和喜子是她ê中學同學，以後koh成做好朋友，到hit當時iáu有teh書信來往。她就講beh寫phoe hō͘ 和喜子，請她授權kā它翻譯做台語出版。過無jóa久，賴長老娘to̍h收tio̍h和喜子ê回函；phoe內寫講她真歡喜知影beh有《陳夫人》台語版ê出版，若出版，chiah寄一本冊hō͘ 她to̍h好。

 

Hit工，賴長老娘歡喜接受我chit-ê「公民記者」ê採訪、錄影，她講：「....我有聽tio̍h風聲講：《陳夫人》是teh寫阮老母ê tāi-chì。我有讀過，he根本to̍h是小說，kah阮ê家庭lóng無仝款。阮ê父母tī日本ê教會正式結婚，阮阿公真歡喜；然後in tńg來到台灣，有起一間兩層樓ê磚á厝。阮老父娶日本bó͘，koh是有知識ê日本女性，阮真歡喜....。」

《王育德自傳》mā有提起《陳夫人》án-ne講：「芳子=安子」to̍h是《陳夫人》小說中ê女主角；第二女主角to̍h是女主角ê cha-bó͘-kiáⁿ「惠美=清子」。王育德mā講《陳夫人》ê男主角「黃景春=陳清文」確實有hit-ê人。

 

華語版ê《陳夫人》是根據1944年ê修訂濃縮版合訂本翻譯；咱ê台語版是根據1941年修訂版ê第一部「夫婦」kah 1942年ê第二部「親子」分開ê版本翻譯，比濃縮版有加真深入ê描寫，像講「序章」to̍h是初版chiah有，修訂版無ê。

 

《陳夫人》ê內容是敘述日本女子嫁入台灣大家族家庭了後ê種種情形，以及當時（1920~1940）tī殖民地型態之下所呈現ê矛盾。陳夫人所面對ê問題有真chē：1）台灣封建大家族ê複雜關係，2）無仝民族ê文化、風俗習慣kah語言，3）殖民kah被殖民，4）基督教kah民間宗教，5）謠言kah惡意中傷，6）Kiáⁿ兒ê身分kah認同問題，以及hō͘ 她ê個性受扭曲等等ê問題。身為基督徒ê庄司總一kā故事處理kah真好勢；伊kā一切lóng交託hō͘ 上帝，用「疼」來化解一切。身為基督徒，這mā是我決定翻譯做台語版ê主要原因。

 

2016年新政府上台了後，台灣母語運動鬧熱滾滾。我ǹg望《陳夫人》台語版ê出版，ē-tàng提供台灣人有家己ê母語小說thang讀。咱tio̍h學習東吳大學客座教日文ê蜂矢宣朗，用《陳夫人》當做台語文讀物，來興起咱ê母語；使用母語，活出台灣人ê尊嚴！咱若無使用家己ê母語，台灣國kám會正常？！

 

為tio̍h beh hō͘ 台語文新讀者方便，附錄有「台華對照表」，列出「漢羅版」、教羅白話字版、台羅正式版kah華語ê對照。Mā請咱tio̍h讀下面ê「台語漢羅版用字範例」（試探性），thang來了解《陳夫人》漢字kah羅馬字lām寫ê寫法。

 

感謝台灣教會公報社tī十月底beh出版chit本有意義ê台語小說，ǹg望chē-chē人買來讀，讀出有台灣味ê基督ê疼。