約翰十三:34,35「我用新的誡命hō͘恁，就是恁著相疼，親像我bat疼恁，恁亦著án-ni相疼。恁若相疼，眾人beh對án-ni知恁是我的學生。」

我是曾骨蕭皮，1948年出世三個月，我的生爸就來過身，生母一ê兩kha查某，kan-na靠種菜賣菜，無法度chhiâⁿ養五ê囡仔，就kā我分hō͘蕭--家養飼。佇蕭--家我是孤囝，chēng細漢身體就真lám，pháiⁿio飼，送hō͘大道公、媽祖婆做契囝，大道公生就愛過火，媽祖生就愛nǹg轎kha。我的養爸是塗水sai-hū，養母tòe leh做小工，tiāⁿ-tiāⁿ著出外作穡，留我一ê囡仔人蹛厝--裡，三頓家己煮、家己食。

我的養爸做塗水貿穡頭，有時陣著愛應酬lim酒，到我讀初三的時，我的養爸生肝癌，無偌久就過往，厝--裡賰養母kap我兩ê人。我的養母興poa̍h -kiáu，若無作穡，就poa̍h kah無暝無日，到我讀高三的時，我的養母生奶癌，癌湠到龍骨，煞規身軀bē-tín-bē動。Hit時陣醫療無啥發達，攏請神明來關來問，有神問到無神，仝款攏無效，平常時仔我攏有耳無喙，雖然我心內反對問神，嘛m̄敢出聲，m̄-koh想著病kah chiah重，無去看醫生kám會使--得？我就大膽kā我的養母講：「省--也[1]！聽人講阿tok仔病院的醫生chiâⁿ高明，我chhōa你來去hia hō͘醫生看，好--m̄？」阮養母應講：「到chia來--ah，無，嘛好--啦！」我隨時kā棉chioh被、衫仔褲、溫瓶kap蹛院會用--著的物件款款--leh，chhiàⁿ一臺三輦車就去阿tok仔病院。

去到tè，隨辦蹛院。一間病房蹛十二ê患者kap照顧的人，bē輸菜市仔--leh。Hit暝我就坐踮椅仔睏，講睏嘛無影，因為阮養母bē翻身，三五分鐘就叫我kā伊péng爿。隔轉工e晡，有一ê阿tok仔婦仁人kap三四ê臺灣人來病房探訪，一床一床問東問西，唱詩歌、讀聖經hō͘患者聽，來到阮chit床的時，我就知影hit陣人leh創啥，我心肝內想講我是大道公、媽祖婆的契囝，我chiah無leh信--你，m̄-koh hit-ê阿tok仔婦仁人koh會曉講臺灣話，問問--leh，伊就講：「真可憐喔，阮兜猶有一頂帆布床，我chiah紮來hō͘你睏。」

以後差不多逐工hit-ê阿tok仔婦仁人攏來看--阮，後--來我知影逐家攏叫伊閔太太。Chit个閔太太對阮chiâⁿ好，我心內leh想，對阮好，就是beh siâⁿ阮入教。Chēng細漢我就聽人講啥mih「入教，死無人哭。」、「地獄烏lu-lu，chhoàn關長老kap牧師。」、「道理精，道理精，聖經揹蹛ka-chiah-phiaⁿ。」我哪會信--你？

後--來我沓沓仔瞭解閔太太kap閔先生是芬蘭人，聽人講是hō͘上帝召來臺灣傳道--的，閔太太是病院的傳道，閔先生是病院的藥劑師。有一工閔先生真好禮，叫閔太太顧我的養母，請我去伊的厝好好仔洗身軀、食飯。佇hia我chiah看著平安喜樂的家庭生活，平平是人，阮兜哪會差hiah濟？

蹛院蹛八個月--ah，阮養母仝款bē-tín-bē動，m̄-koh心情有較好，免煩惱三頓，koh有人替伊揉身軀，癌症末期，身體若痛疼，病院會替伊止疼。阮養母大便bē通，攏是護士來灌腸，腹肚chiah bē脹疼，有一kái病院患者來真濟，護士真無閒，bē得thang來灌腸，腹肚脹疼kah beh害--去，拄好閔太太來，伊叫我去外口，隔有一時仔叫我入--來，我入--來的時看阮養母加chiâⁿ快活，閔太太走了後，阮養母chiah kā我講是閔太太用手chéng頭仔kā通--出-來-的。

更深夜靜的時，我一直leh想chit件代誌，一ê看--起-來真高貴的人哪會甘願án-ni做？若準講為著傳福音，beh假嘛假無路來。隔轉工tōng著閔太太，我kā說ló͘力，亦順sòa kā問講你哪做會來？伊講：「因為我知影耶穌疼--我，嘛教示我著愛疼--人親像疼家己，我就是為著這來臺灣--的。」我聽了tām-tām無講啥，m̄-koh心肝頭是一直滾絞，基督教m̄是我以前所想--的án-ni。

有一工阮養母講伊beh入教，就叫謝奇麗牧師kā伊洗禮，洗禮煞，阮養母kā閔太太kap閔先生講：「我若去上帝hia，阮chit口灶賰chit-ê囡仔niā-niā，hō͘恁做契囝，好--m̄？」閔先生講：「Chiâⁿ好！做你放心，阮會照顧--伊，上帝嘛會照顧--伊。」

過無偌久，阮養母就去上帝hia，我就家己一箍人去臺北讀冊，ná讀冊ná追求上帝，一冬了後，我轉來嘉義基督教病院的榮光堂受洗。上帝的疼痛是hiah-nī大，藉著眾信徒的疼，hō͘我認bat基督，歸ǹg基督，感謝主！