讀經版本：Ruby版《聖經ê愛情、智慧文學　雅歌、箴言》，2014，台北：全民台語聖經協會

進　　度：雅歌第六章、第七章

第六章第11節　我落去核桃園，beh看山谷中青翠的食物。「食物」？愈讀愈感覺奇怪！《巴克禮》：我落去硬殼ê果子園，beh看山谷中青翠ê植物。《和合本》：我下入核桃園，要看谷中青綠的植物。《現代中文》：我下到杏樹園，要欣賞山谷中的幼樹，“BBE”: I went down into the garden of nuts to see the green plants of the valley, 《日文聖書》：わたしはくるみの園に下りて行きました、流れのほとりの緑の茂みに、「緑の茂みに」意思是「綠色繁茂的樹欉」。是按怎干單《全民》譯作「食物」咧？原來《巴克禮》白話字版譯作“si̍t-bu̍t”，漢字「食物」kah「植物」發音相仝，但是若看前後文，kā“si̍t-bu̍t”譯作「食物」bē通，是錯誤的。

第七章第7節　你的身材ná親像棗樹，《巴克禮》：你ê身裁親像棗樹，《和合本》：你的身量好像棕樹；《現代中文》：你的身材婷婷如棕樹；“BBE”: You are tall like a palm-tree, 讀了煞花去ah，到底是棗樹抑是棕樹？好佳哉看《日文聖書》才明白，第9節譯作：ナツメヤシの木に登り。「ナツメヤシの木」m̄是棗樹mā m̄是棕樹，英文名叫作date palm、中文譯作「海棗樹」有khah生疏。但是佇台灣咱若講椰棗樹、抑是講伊拉克蜜棗樹，可能khah濟人知。椰棗產量誠大，m̄-nā是中東沙漠地區人民重要的替代食品，mā是中東一寡國家足重要的出口農作物，佇台北市迪化街真濟店攏有teh賣。過年時仔迪化街店家會推出in想出來的新商品：Kā椰棗剖平、子提掉、內底chiⁿ一塊核桃，講是過年時送親友、抑是家己食上理想的「四秀仔」，m̄-nā好食koh有營養的健康食品，聽講生理誠好。椰棗佇阿拉伯世界神話、傳說中有真重要的地位，沙烏地阿拉伯（Saudi Arabia）國徽頂面hit欉樹仔就是椰棗樹。

第七章第13節　催情果發出芳味，《巴克禮》：風茄出芳味，《和合本》：風茄放香，《現代中文》：你要聞到催情果的香味；“BBE”：“The mandrakes give out a sweet smell,”是按怎《巴克禮》kah《和合本》譯作「風茄」，《現代中文》kah《全民台語》講是「催情果」？風茄到底是啥物？是m̄是催情果？咱知chit-ê植物第一遍出現佇文獻頂面，是記載佇《創世紀》第三十章第14節：割麥的時，流便去田裡，得tio̍h風茄（hong-ka）提來hō͘伊的老母利亞。拉結對利亞講：「請將你的子的風茄hō͘我。」利亞對伊講：「你搶奪我的丈夫，豈是小可事？你koh搶奪我的子的風茄嗎？」拉結講：「為tio̍h你的子的風茄，所以今暝伊通kah你相及睏。」

傳說中它有幫助查某人受孕的作用，真有可能是因為它的根親像人的形，那像東方的「人蔘」。但是若照《維基百科》的記載，tī中世紀，風茄價數相當懸，有水手會買一小片風茄的根囥佇身軀、聽講會保佑伊航海平安；有人會kā一小片風茄的根囥佇大門頂，會防止火災kah賊仔入來偷the̍h；有人kā一小片的根囥佇枕頭下會加真好睏；特別是嬰仔床鋪下面囥一小片風茄的根，嬰仔khah bē作惡夢。譯作「催情果」khah有爭議，不如直接譯作「風茄」。