真歡喜讀tio̍h chit期（#161）ê《新使者》，除了「母語葡萄園」有四頁台語文，tī「成長部落格」koh有一篇hō͘ 我真意外ê三頁台語文—「咱若要做朋友，頭先要先互相了解」。Kám會是我hit篇《慶賀「母語葡萄園」10週年》（#159）有引起共鳴？我ǹg望是án-ne。

 

我通過Facebook ê messenger寫phoe hō͘ 作者吳純瑜小姐：「純瑜：pêng-an, 真歡喜tī《新使者》#161讀tio̍h你ê大作。讀了真感動，....我tī雙連教會擔任20年ê長執，我真了解你想beh突破ê處境。我tī「體制外」做「台語信望愛網站」、「客語信望愛網站」kah「思羅安信望愛（台語點字）網站」。你hiah少年to̍h有法度寫hiah好ê台語文（雖然iáu有真大ê進步空間，因為lín受tio̍h中華民國語ê影響真深）。Chia̍p讀chia̍p寫to̍h會進步，請你來參與台語信望愛網站ê事工kám好？」

 

我2002年開始學台語白話字，李勤岸教授講：「咱tio̍h增加台灣母語ê曝光率。咱祖先留hō͘ 咱ê智慧箴言：「功夫若beh幼，tio̍h ài先有好用ê器具」（工欲善其事，必先利其具）。我to̍h kah台語信望愛合作開發「信望愛台語客語輸入法」、「華語轉台語/客語」、「（台語/客語）全羅轉漢羅」、「（台語/客語）漢羅轉全羅」、「台語/客語Unicode轉碼」、「（台語/客語）教羅台羅轉碼工具」、「（台語/客語）Ruby線頂形成工具、「英語轉台語」等等ê工具，免費hō͘ 大家用。我今年72歲á，一直teh走chhōe少年人來傳承「台語信望愛」所開發ê「台語文工具」，to̍h是免費下載ê http://taigi.fhl.net/twcd.zip。

 

真chē人想beh寫台語文，m̄-koh lóng sa無寮á門，m̄知beh án怎著手來開始。我建議ē-sái先用「華語轉台語」ê工具，kā家己以前ê華語文章改做台語，一步一步to̍h ē-tàng了解án怎寫台語。續落來beh直接寫台語文，建議使用信望愛台語客語輸入法（ http://taigi.fhl.net/TaigiIME/ ，台灣基督長老教會總會規定牧師考試tio̍h用chit-ê輸入法phah台語講道稿）。我tiāⁿ-tiāⁿ鼓勵少年人：「Chia̍p讀chia̍p寫to̍h會進步，請你來參與台語信望愛網站ê事工kám好？」若來參加台語信望愛網站ê工作團隊，ē-tàng沿路做沿路學習所有ê台語文工具，ē-sái講是「一兼二顧，摸蜊á兼洗褲」。

 

台灣教會公報社社長方嵐亭牧師今年三月來波士頓訪問。Tī hiah窄（e̍h）ê台灣，阮兩人真罕得見面，koh khah無機會深談；tī hiah大ê美國，阮卻有三工四瞑ê做伙時間，我相信這是上帝ê引chhōa帶領。方牧師講：「台語文m̄是kan-taⁿ ē-tàng寫文學，台語文是一個工具，《台灣教會公報》每一篇lóng ē-tàng用台語來寫。」無m̄-tio̍h，1895~1967年ê教會公報100%是使用白話字。中華民國政府因為錯誤ê「國語政策」，圖謀消滅台灣母語，soah來禁止白話字，甚至燒白話字聖經，kah-ná秦始皇ê「焚書坑儒」。我mā深深體會tio̍h「統治者禁止ê物件lóng是siōng好ê！」

 

《新使者》雖然無親像《台灣教會公報》有台語白話字ê歷史淵源，卻是台灣基督長老教會總會對教會青年ê文字工作，非常重要。咱m̄-thang kā家己kah-ná食鴉片中毒ê「中華民國語」，koh beh hō͘ 咱ê下一代繼續來食chit-ê鴉片。M̄-thang koh繼續講：「中華民國語ê縛腳雖然艱苦，m̄-koh khah súi。」

 

台灣長老教會總會以：「新而獨立ê國家」ê人權宣言來驕傲，出發點真好。M̄-koh，咱想看māi leh，咱ê信仰前輩有理想、有行動，taⁿ咱chit代kan-taⁿ teh hoah口號，卻無行動，án-ne kám好？若無使用家己ê母語，咱台灣國kám會正常？！咱總會ê出版品有gōa chē是中華民國語？有gōa chē是用咱家己ê母語？

 

鄭兒玉牧師在世ê時tiāⁿ-tiāⁿ講：「長老教會ê “leadership”（領導階層）lóng是「中華民國語」政策ê受害者。總是，chiah-ê領導階層m̄知好覺醒，繼續teh用「中華民國語」迫害家己ê母語！」中華民國語人teh起造新ê「巴別塔」，長老教會soah teh加入起造「巴別塔」ê行列。咱tio̍h謹慎聖經ê教示！

 

我tùi《新使者》#161期看出咱有teh起動，少年人比長老教會ê領導階層khah愛咱ê母語。我建議咱tùi「大專世界」開始選一篇來做「台語-華語」對照ê排版；我會tī台語信望愛網站開一個專欄，加上台語朗讀，幫助少年人來親近母語。Mā tio̍h邀請有趣味台語ê青年來參與chit-ê事工，hō͘ 咱大家行動起來，來實現基本人權：使用母語，活出台灣人ê尊嚴！