天官賜福

極其恬靜。

 

當子時的鐘聲teh欲響，我踏著穩定的腳步，經過已經欲歇的地上萬物，閣若牛一樣、卻是規律的喘氣。佇舊曆年的路尾，重新培養的運動習慣，親像作穡人透過汗kap全心全意，kap自然以及掌理萬權的交通，我仝款用汗水來摒空家己，佇一工欲煞的時。

 

過去的一年實在風湧不斷，疫情猶原佇世界猖狂，無有一個所在無受影響。總是咱台灣佇政府得宜的政策以及全國民眾全力配合之下，宛然成做和世界相隔離的桃花源，通自由自在過日。雖然疫病的陰影罩倚原在，佇恩典中無閣搖泏；頭前的路霧霧無明，咱剛強壯膽向前跑走。

 

燦爛未來

「天官賜福」，不時會看著貼佇門頂的春聯是這四字。天官就是所謂「上元一品賜福天官」，是傳統內底道教掌管所有神明的，m̄-koh chit-má已經成做眾神明的指稱；透過貼寫著天官賜福的春仔，祈求未來一年事事順利。卻咱屬上帝的人，上主恩典的翼股就時時遮蓋。

 

這个世界那親像是向閣較烏暗混沌的所在行去，總是阮知，佇烏暗的背後是光明燦爛；kiám-chhái這時咱所面對的困境是過去無法度想像的，也改變久長以來人類所建立的社會面貌，m̄-koh也因為按呢，咱更加珍惜chit-má咱所有的，親像疼，親像ǹg-bāng，親像恩典。

 

河水的氣味，和風佮月娘天星teh引chhōa，chhōa我繼續行向夜深人靜的所在。

本文母語聲音QR Code