社青ê辛苦
社青就是後一代ê社會，in ê性命決定紲落來社會kap教會ê發展。佇現今ê環境對社青實在足辛苦，面對未來逐項ê困境：結婚、工作、車、厝、家庭等等，攏是足重ê經濟負擔，亦面對社會種種對in ê期待kap壓力。尤其佇教會ê社青，閣需要面對服事kap會友ê關心。所以信仰kap生活確實是社青足大ê挑戰，也是足容易離開教會生活ê階段。
教會先接納社青
基督教教育如何牧養社青是教會重要ê挑戰。佇路恩哲（Andrew Root）、丁康黛（Kenda Creasy Dean）所tù《每個孩子都是神學家》這本書寫著對神學ê看法：「神學處理ê是危機――本身ê危機，就是你是活咧ê，也就是『你有一份性命愛活ê事實』，必須注意上帝kap人佇危機中間ê關係。」需要處理處境ê問題，人為什麼欲活咧？人一生ê意義中間，時間kap永遠對人ê意義是甚麼？
所以對社青ê關心不只ài關顧in ê生活，需要時時kap in討論對信仰ê理解，因為社青攏對信仰有家己ê看法。閣較需要注意去了解對in性命ê危機，所sán-seng對信仰ê憢疑去幫助，這是足重要ê關鍵問題，這也考驗教會對社青ê接納，因為關係這个時代有足chē多元ê議題，若無先接納，就無法度去聽著in佇危機時真實ê聲音。社青ê危機佇教會chhōe無出口，可能就會離開教會，所以做伙拍拚，扶持社青佇危機時ê困境，也提供in佇教會有空間去cháu-chhōe信仰ê真理。
|