|
若講起台語抑是台灣逐種本土語言的未來，大部份人攏是真悲觀，尤其當愈來愈濟少年仔對台語、客語等等本土語言毋 nā 袂曉講，甚至是聽無的時，對致意本土語的人來講，確實是予人足著急的。因為咱會煩惱佇咱猶未老的時，就無閣再有少年仔聽有咱咧講啥矣。
所以咱會去怨嘆啥人明明會曉講母語，煞甘願去做無佮囡仔講母語的「越頭族」；咱會去比較佗一个牧師台語無輾轉、佗一个牧師袂曉講台語；甚至咱會去批評教會佇聯合禮拜 ê 時無講台語、抑是已經無台語禮拜矣。遮 ê 代誌的確是會予人感覺可惜，甚至是失望。總是，每一个人咧選擇欲講啥物語言、欲用啥款語言佮人溝通，本來就毋是干焦考慮「欲抑毋」niâ。
毋 nā 愛考慮對方抑是台仔跤聽眾的背景、家己的能力，或者是所欲講的內容敢通正確來傳達？甚至若是拄著多元族群的場合，所愛考慮的代誌是愈濟。「語言」這件事，當來到佇公眾的場合，就毋是干焦「溝通的工具」、「民族的象徵」hiah 簡單矣，會產生閣較複雜的政治問題。咱若毋知影、抑是無去想遮 ê 問題，就去指責人無講台語，有當時仔，誤會就是對遮來的，甚至可能會有無必要的糾紛，顛倒予台語路愈歹行。
所以咱著用啥物款態度來看待今仔日的語言運動？除了鼓勵人愛較 chia̍p 講，咱猶通創啥？以下講兩項予逐家參考。首先，我真愛一个例，就是「台語 wi-fi」。確實佇這馬的環境，欲主動講台語抑是各種的母語，攏無 hiah 簡單，所擲出去的話，對方無一定接會起來，總--是咱家己著成做母語的「wi-fi」，予身邊的人知影，kap 咱講母語是真輕鬆、無壓力，袂因為講了無輾轉就 hông 恥笑。換句話講，咱愛成做彼个予人願意講台語的人，咱若成做這款人，身邊講台語的人定著會愈來愈濟。這是第一項。第二項是講：咱會曉講的人，著做伙來創作，共咱的母語寫落來，未來就會成做人學習語言的材料。咱愛予人有豐富閣多元的學習文本，人若有一工欲學，才有夠額的材料通使用。
這兩項是真要緊，嘛真值得咱做伙來思考 kap 實踐。今仔日的台語文讀物愈來愈濟，閣有現代台語譯本 ê 聖經出版，這是過去幾十年來台語文運動的成果，咱這馬所愛想的，凡勢毋是「人佗位做無夠」，顛倒是較愛想講：「咱會當閣做啥？」
願咱眾有志做伙來拍拚，繼續開闊台語路！
延伸閱讀：
1. 石牧民。《台語解放記事：寫給台灣人的「華語腦」翻轉指南》。前衛出版社，2023。
2. 劉承賢。《語言學家解破台語》。五花鹽有限公司，2022。
3. 呂美親主編。《台語現代小說選》。前衛出版社，2022。
4. 呂美親主編。《台語現代散文選》。前衛出版社，2024。
|