新使者雜誌
簡介
雜誌閱讀
出版叢書
購買訂閱
廣告刊登
相關網站
聯絡我們

推文:Facebook plurk twitter
新使者雜誌 > 第102期 唱我所信‧信我所唱
字級調整:

母語葡萄園
蕭泰然教授ê台灣心kap台灣情
關鍵字:
作者/林俊育 Lîm Chùn-io̍k (台文工作者)
 
六月中受南加州台灣基督教聯合靈修會(TPC)邀請去分享「台語文電腦工具kap網路資源」,我順續由郭得列牧師駛車載我去拜訪養病中ê蕭泰然教授。
 
陳佳芬姊安排阮tī六月18日下午三點去到蕭府,chhi̍h電鈴了後,蕭夫人滿面笑容來開門,請阮tī客廳坐落來了後,蕭教授就落樓來迎接阮。阮兩人已經十gōa年無見面loh,握手久久chiah放。看伊精神飽足,講話聲音有khah弱,卻也hō͘我感覺伊ê身體有漸漸teh回復,心內講出:「感謝主!」
 
回想1996年kap陳隆兄同齊去聆聽二二八紀念音樂會,soah會ê時遇tio̍h蕭教授,陳隆兄就講順續載蕭教授tńg去in厝。這是kap蕭教授初見面,hit當時我得tio̍h文建會獎助boeh出版《讓音樂燃亮生命》(慕光叢書5,雅歌,1996),就邀請蕭教授為hit本冊寫序。聽我講hit本冊是teh描寫台灣傑出ê視障音樂家,伊一聲就答應,chit-ê初見面ê見面禮hō͘我真大ê鼓舞。
 
2001年我翻譯男高音安德烈.波伽利(Andrea Bocelli, 盲人)ê傳記《新世紀之聲─安德烈.波伽利》(遠流,2001),mā有請蕭教授寫序。我kap我ê中文寫作指導曹永洋老師,kā譯稿送去淡水海明威大廈ê蕭教授府上,伊真歡喜答應為hit本冊寫序,koh請阮食中晝,hō͘我感覺真溫馨。Hit當時伊有講:「我心臟開刀ê時是一陣台灣朋友kā我救起來ê,我欠台灣人ê情,我ê身體雖然iáu真虛弱,也tio̍h繼續為台灣寫曲。伊所作ê曲lóng充滿「台灣心kap台灣情」,真chē名曲也有tī世界各大音樂會演奏,用音樂tī國際上為台灣出聲,提升台灣ê知名度。
 
一直忠實為蕭教授整理樂譜製譜ê莊傳賢先生,有kā蕭教授ê一生經歷整理出版《世界級ê台灣音樂家─蕭泰然》(蔡明雲撰文,玉山社,2006)。我讀了真感動,感謝主賞賜咱台灣chit位有台灣心koh有台灣情ê作曲家,來激勵台灣人ê心。讀完chit本冊,我就下決心一定tio̍h去拜訪chit位老朋友,並且採訪錄影製片來上網,hō͘ koh-khah chē人來siàu念伊。
 
蕭教授是一位虔誠ê基督徒,青年時代tī教會kap學校就有傑出ê音樂表現。採訪中我講起冊中ê chit段記事ē-sái做現此時台灣青年ê模範,請伊講出hit當時ê實況來kap台灣青年分享。伊謙卑講:「Boeh做模範是m̄敢講,只有盡我所能(ē)來做,chit-má ê人ē-tàng做比我khah-chē好ê tāi-chì,來hō͘台灣ê青年得tio̍h koh-khah chē ê利益。」
 
《世界級ê台灣音樂家─蕭泰然》chit本冊是蕭教授ê傳記,有詳細描寫記述伊一生ê奮鬥,被迫離鄉背井、kap病魔爭鬥,伊講lóng是óa靠主ê恩典kap保守。請大家tio̍h去買chit本冊來讀,chit-pái ê採訪錄影記錄,請參觀台語信望愛 http://taigi.fhl.net/ 台語影音園區/第77篇,或直接點選 http://taigiol.fhl.net/vcd/rotaiugbk.php?user=taigi&bid=1&proc=read&msgno=77 ,請大家繼續來為蕭教授祈禱。
 
同作者相關文章:

原文來自 http://newmsgr.pct.org.tw/magazine.aspx新使者雜誌 第 102 期 唱我所信‧信我所唱 (76-76頁)
新使者雜誌 The New Messenger  102期  2007年  10月 唱我所信‧信我所唱 102
本期主題:唱我所信‧信我所唱
發行日期:2007/10/10
讓音樂成為聖靈的工作!
目錄s/
英加長老教會聖詩在台發展──兼論教會聖詩之本土化
台灣基督長老教會新《聖詩》編輯之理念與實踐之挑戰
大家都愛敬拜讚美?!
流行音樂可以有福音嗎?—訪黃國倫
每個時代有它自己的「敬拜讚美」
原住民教會音樂創作之現況
台灣的第一位女鋼琴教授──高慈美
祝福,從苦難開始──寶島歌王洪一峰全家的信仰告白
「星光幫」教我們的事
以色列的哀歌對台灣人的意義
傳統聖樂如何與「敬拜讚美」和好?
重拾「團契」的真諦——從細胞小組教會的發展談起
藝術與品格雙修——嘉西藝術週末營
掙脫「自由」的轄制!——我讀《活出十誡的真自由—通往自由人生的路標》
小朋友的好朋友
蕭泰然教授ê台灣心kap台灣情
五月出荔枝
與主相約???三週行
來自武界的感動