雖然我佇南部大漢，佇嘉義北榮教會讀主日學，過青年團契ê生活。毋拘，實在講，我對鄭兒玉牧師並無熟似。

對鄭兒玉牧師有khah 深ê 印象，是三ê機緣。第一ê是我ê大姨是布袋教會ê會友。我ê大姨李陳蔥女士（鄭牧師應該叫伊Chīn- -a），佇我細漢ê時，每一擺講話，差不多攏有「鄭兒玉牧師講……」參雜佇伊ê見解中，這予我真好奇：「鄭兒玉牧師是啥物人？」

第二ê是當我讀2008年國史館出版彼本《台語文運動——訪談暨史料彙編》ê時，讀tio̍h鄭牧師ê部分。佇這內面有提起，1975年7月初4、初5，佇紐約大學舉行ê美東台灣同鄉會有演出鄭牧師ê作品：〈台灣人ê哀歌〉、〈先知ê呼聲〉、〈台灣人ê祈禱〉。彼場演出，予在場一千三百外ê參會者做伙大聲哮，這項代誌，予我印象chiok 深chiok深。

第三ê是，我有機會口試黃玲玲老師ê碩士論文《鄭兒玉牧師ê文化思想Kap推動：1961-2002母語寫作所顯出- -ê》，通過這本論文，我會當khak熟似鄭兒玉牧師ê語言、文字、國家、宗教ê主張。我讀了，真正是吐一ê大khùi。問家己，是啥物款ê時代chiah會形成這種堅定ê人格？事後，我一再重讀黃武東牧師ê《黃武東回憶錄》，高俊明牧師ê《十字架之路》。予我一再重讀ê動機，嘛是欲問，是佇啥物時代，是啥物款ê教育，chiah會形塑這款ê基督徒？

我也要表示對黃玲玲老師ê佩服。伊一面教冊，一面讀碩士。台灣ê社會我想mā要求伊愛好好理家。佇遮呢濟ê工課中，伊一點一滴完成這本論文。而且，佇用中文是主流ê台灣社會，伊歡喜用台語，用白話字，用全羅來寫一位持守白話字ê前輩ê心聲。伊行一條真少人行ê路，我想這是勇氣kap堅持。

佇遮，閣一擺感謝鄭牧師對母語ê付出。特別聽著伊今年90歲，對心底為伊祈禱，真正期待伊會當活百二，繼續引chhōa阮chiah ê後輩，予阮猶原有典範通o̍h。也閣一擺多謝黃玲玲老師。欲kā妳講，妳所做- -ê，真正拍動阮ê心。

【編按】：                                                                                                                                                                                                                                                                          本文寫作於2012年，鄭兒玉牧師當時九十歲。