新使者雜誌
簡介
雜誌閱讀
出版叢書
購買訂閱
相關網站
聯絡我們
推文:Facebook plurk twitter
新使者雜誌 > 第136期 基督教美學
字級調整:

母語葡萄園
媠䆀無比止
「米」kap「水」,是咱稻作文化ê族群,上kài基本ê生存要件。
關鍵字:
作者/王昭華 (台文作家)

「媠」、「䆀」這lō代誌,攏講是在人--ê,人若感覺媠就是媠,人若看著-䆀就是䆀,「媠䆀無比止,愛--著較慘死」,媠䆀iah䆀媠,儘看看敢有中人意。

偏偏這个世間,一樣米飼百樣人:伊看講有夠媠--ê,你實在看無 啊he是佗leh媠;你嫌人䆀甲有賰--ê,人伊都感覺-嘿!閣袂䆀neh!⋯⋯人kap人之間,欲有「同感」oan-ná無簡單,對媠䆀ê感覺、感受,有一个西洋傳--來-ê、咱本底無ê名詞,叫做「美感」。

講起「美感」,人若無看字,犯勢有可能sa無,m̄-koh,若去講著「肉感」,這逐个現聽隨知,就是「肉肉肉」的「感」覺。按呢講--來,「美感」就是「美美美」ê感覺囉?!⋯⋯M̄知為啥物,查某人生了䆀,會hông笑「阿䆀--ê」,若是生了媠,soah若像無人leh叫「阿媠--ê」;正經號名攏是號「美」無號「媠」,「阿美仔、阿美仔」按呢叫,chiâⁿ親切ê菜市仔名。「美女」、「媠查某」,袂講「媠女」、「美查某」,「美」kap「媠」到底是啥物關係?我無聊無聊,攏kā想講,「水」是leh止喙ta--ê、是會當kā骯髒物洗清氣--ê,不而過,閣較按怎講,嘛是就愛食「米」,腹肚才會飽;「米」kap「水」,是咱稻作文化ê族群,上kài基本ê生存要件。

咱o-ló一个姑娘仔kài媠,會講伊「媠~噹噹」,he「噹噹」兩聲,敢有啥物特別ê意義?換別个聲音敢袂用--得?Bat聽人講,he「噹噹」ê音響效果,是代表古早古早chiok會堪得妝ê美女,金釵耳勾phoa̍h鍊手環腰帶玉佩一身齊備,人袂到,聲先到,行著路,配件叮叮咚咚噹噹,「媠」是目睭看--ê,「噹噹」是耳仔聽--ê,組合--起-來構成咱對一个美女ê認知——這m̄知是有稽考ê正經話,iah是pûn雞胿leh講笑。囡仔時代狡怪性,攏會kā「噹噹」閣繼續「噹」--落-去,媠「噹噹噹噹」、「噹噹噹噹」,啊!命運ê挵門聲,媠姑娘仔來--ah!加噹欲幾ā聲,表示真正有夠媠ê媠。

「䆀」出現ê時,m̄知為啥物,後壁tiāⁿ會拖兩个枷,「䆀kê-kê」、「䆀枷枷」,「䆀」kap「枷」哪會縛做伙?人人攏愛媠,「䆀」soah有影親像一副無形ê枷,䆀人受外貌來限制,佳哉,這款限制m̄是hiah-nī絕對--ê,媠人嘛有媠人ê枷,敢m̄是?⋯⋯一直到出社會食頭路,我才知影有一種物件嘛叫做「kê(膎)」,看著玻璃矸仔內底有擠蝦仔--ê,嘛有擠花枝--ê,閣有擠丁香--ê,chhiⁿ--ê無過sa̍h就擠入去豉,豉甲鹹剁剁,夾一屑仔出來配糜配飯,豉膎的海口人講這讚--ê、這chiok好食,我想講彼內底的物仔攏是chhiⁿ--ê,m̄就等於豉ê sa-sí-mih?平洋sông我,對he透明ê矸仔內擠甲密chiuh-chiuh、該爛未爛ê海洋生物,略仔會驚驚,彼時去想著「䆀膎膎」。

媠kap䆀,逐工目睭peh金,就出現tī咱ê生活中。有ê人對「媠」chiâⁿ敏感,有ê人對「䆀」早就痲痹。媠kap䆀ê判斷力,是神安tī咱體內一條非常特殊ê神經線,卻是,若欲tī台灣這塊蛀甲害害--去ê島嶼活--落-去,這條感應媠䆀ê神經,無thāu死、無抽--起-來,日子是chiok痛苦--ê;正經欲thāu--死、欲抽--起-來,做一个無感無覺ê人,有啥物意思?——哪會無意思?媠䆀只是外相啊,袂去計較媠䆀才是無分別心啊,台灣人早就超越「媠」kap「䆀」ê境界,追求--ê是「爽」,這你敢m̄知?

敢會?愛媠ê人,敢m̄是愈來愈濟?男男女女重妝閣gâu妝,保養品化妝品m̄驚無市場,整型外科美容手術當時行;愛媠是人ê天性,可惜這款天性假若kan-ta有才調發揮tī「人」家己身上,kā家己妝媠媠,總是比妝痟--ê較健康,對社會嘛算一份貢獻;無法度管人厝mài起hiah koân起hiah䆀、看板mài做甲hiah大圈hiah刺目,總--是會當決定家己衫今仔欲穿佗一軀、指甲油歡喜欲抹佗一色⋯⋯可憐ê「無力者美學」。

踏出家門,媠--ê攏是愛開錢--ê,生理場ê商品是按呢,觀光區ê天然景緻漸漸嘛欲變按呢,後日仔想欲享受海沙埔ê日頭,可能攏就愛去蹛海墘仔ê大飯店才有彼个福氣。四界行踏,䆀--êsoah攏正常--ê:溝仔溪仔無一條清氣--ê,打馬膠路是欲hō͘車駛m̄是欲予人行--ê,偷擲ê pùn-sò,續手hak-ka̍k ê飲料罐仔,亭仔跤變車庫,人行道有ná無,看板相爭伸欲到路中央,光天白日LED燈管嘛閃閃爍,頭前路、後壁巷,鐵窗對鐵窗,籠仔內ê譀古人生,有人連一个籠仔都買袂起喔,閣嫌?!

「媠」kap「䆀」,是咱家己做得來,咱人所創造。M̄知伊甸園內彼欉分別好歹ê樹,果子食落腹,會當分別好歹,敢也會當分別媠䆀?〈創世紀〉內面,上帝創造天地萬物,見創造一項一類,就有一句講「上帝看伊是好(和合本:上帝看著是好的)」。我定定想起這个「看」——創造者對受造物ê眼光——「看伊是好」,我想講,這个「好」是肯定、完成kap歡喜吧。上帝並無講「看伊是媠」。

「媠䆀無比止,愛--著較慘死」,這句俗語不止仔有鱸鰻氣,雖然明白人leh講這句話ê意思,he若真心去愛--著,才無leh管愛人仔生做媠䆀--ah。Iáu m̄-koh,tī我心內,「愛--著較慘死」soah攏會出現耶穌ê形象——想欲笑,閣知笑若像m̄-tio̍h neh,奇妙ê感覺。

媠䆀kap愛,慘死kap活命,就按呢,m̄知閣會當講啥。

同作者相關文章:
白話字a-ḿ (第 160 期)
媠䆀無比止 (第 136 期)
電一下思想起 (第 124 期)
破碎 (第 120 期)
人生區間車 (第 117 期)
佇天--裡 (第 114 期)

原文來自 http://newmsgr.pct.org.tw/magazine.aspx新使者雜誌 第 136 期 基督教美學 (64-66頁)
新使者雜誌 The New Messenger  136期  2013年  6月 基督教美學 136
本期主題:基督教美學
發行日期:2013/6/10
基督教美學
基督宗教的美學—在神學與靈修當中遇見「美」
藝術與信仰:從美感認識信仰、從信仰中體會美
教堂裡的現代藝術——衝突與接納
有意義的教堂美學
從《公東的教堂》探索教堂美學與信仰
我的亞洲基督教藝術經驗
學習聽聞大地的聲音
在工作、祈禱與靜默中和上帝重新相遇——我在曠鄉(下)
打造從心而出的美麗環境
「吃」與「饞」
旅行中的心靈相機
話說彌迪理牧師
教養、宗教與基督:從《矢内原忠雄傳》想到的
媠䆀無比止
參與 WSCF-AP Women Doing Theology 心得
核四?核能?究竟為何而反?
成為天國的富翁
三驚有夢——讀吳祥輝的國家書寫三部曲系列
讓人起雞皮疙瘩的感動