新使者雜誌
簡介
雜誌閱讀
出版叢書
購買訂閱
相關網站
聯絡我們
推文:Facebook plurk twitter
新使者雜誌 > 第156期 愛及曠野
字級調整:

母語葡萄園
台灣教會史ê台文筆記 2 ─ 南中東門教會、潘道榮、淡水教會
人生ê路,常常會拄著十字路口。
關鍵字:
作者/張德麟 (牧師,中山醫學大學台文系退休教授)

※黃、潘兩牧師在台南東門教會

賴永祥教授ê《教會史話》實在精彩,做學問ê工夫真幼路。譬如講498話〈潘道榮當東門副牧〉。賴教授講,1934年長榮中學屈服佇日本政府ê要求,將所有ê課程日本化,致使黃俟命ê台語聖經課無法度擱開。南中東門教會雖然是台灣頭一間有正牧、副牧ê教會。毋拘,原本黃俟命牧師ê謝禮是長中出--的。黃俟命離開長中,東門教會sûi-sî感受著愛付主牧、副牧、女傳道、職員工友所有ê謝禮ê壓力。對按呢,教會分派系,有人支持黃俟命;有人支持潘道榮。萬榮華牧師考慮著「教會內安寧」,提議請兩個牧師攏離開東門。

黃俟命牧師佇1934年9月(?)離開東門教會。他真痛苦,10月去日本東京揣大子黃彰輝(彼時黃彰輝是東京帝大ê學生)。黃俟命蹛佇東京,kap黃彰輝父子二人做伙讀《約伯記》三禮拜。黃俟命後來轉來台灣,一段時間後,就去大肚教會牧會矣。

潘道榮leh?潘道榮任職到1935年3月25。東門教會佇彼工開一個送別會,期待伊新接ê職務,就是教會公報ê發行人、主筆,會當一帆風順。1935年5月ê《教會報》,潘道榮有寫一篇短文〈愛kā東門教會53名ê代表者seh-siā〉。名單頂面有蔡愛仁、蔡愛義、戴明福、林百萬、宋水琴…等人。賴教授目睭真lāi,伊注意著趙天慈kap趙陳謹慎無佇名單頂頭。這份名單小可予咱知影,佇彼ê時陣,二派人馬中,到底啥人thīn啥人。兩位牧師離任,東門教會向傳道局申請許鴻謨傳道去東門幫忙。沒偌久,1936年5月13日潘道榮tō擱轉去東門loh,這擺擔任ê職務是正牧。(註1)

※北部新人運動

1935年3月25日潘道榮離開東門,1936年5月13日潘道榮擱轉去東門。這中間一年外,潘道榮干單擔任《教會報》ê工課?毋是!潘道榮有去掃著北部「新人運動」ê風颱尾,這項代誌愛小可交代一下。

加拿大的「教會聯合運動」是二十世紀初ê一個教會合一運動。經過四分之一世紀ê協議。加拿大ê衛理公會、公理會kap三分之二ê長老教會,佇1925年聯合組成「加拿大聯合教會」(United Church of Canada)。這項代誌,有三分之一ê長老教會無欲加入。這三分之一ê人對in ê法定地位、財產分配,kap聯合教會戰真久。

這個反對力量,繼續giâ長老教會ê旗-á。佇1925年,in保留「加拿大長老教會」ê名,嘛維持海外八個宣教區,其中一個是台灣。

彼陣佇北部ê長老教會宣教師,差不多攏傾向聯合教會,干單偕叡廉夫婦kap in無仝。佇這款情形下。1927年到1931年,有二十幾個宣教師離開北部教會。譬如講,吳威廉牧師娘,伊ê查某囝吳阿玉、吳花蜜以及高哈拿、劉忠堅夫婦、馬大闢夫婦等,攏落去南部教會。影響蔡阿信醫師真深ê金仁理去日本。這是聯合教會成立對台灣北部教會ê第一個影響。第二個影響是,留佇北部教會,上資深--ê,chhun偕叡廉先生。偕先生kap伊ê姐夫艋舺教會ê陳清義牧師,兩個人掌握規個北部教會ê事務。這項代誌,引起一寡仔青年傳道ê不滿,這陣人反對少數人控制整個教會,嘛真認真讀pa-lú-toh(Karl Barth) ê神學。這陣人興起ê運動叫做「新人運動」。參與ê人牧師有陳溪圳、鄭蒼國、蕭樂善、高端莊、吳清鎰,長老有陳清忠、鄭進丁、陳芳本、彭石榮、余約束等人。(註2)

※淡水教會曾想聘潘道榮

倒轉來講潘道榮。1935年3月,潘道榮離開南中東門後,有準備欲去淡水教會。這項代誌,偕叡廉先生應該chhiâu有tio̍h。為著淡水教會無佇北部教會揣人,煞去南部請人。「新人運動」ê人就佇《傳教師會誌》第四回第25頁畫一張圖諷刺偕先生。這張圖畫一tó˙牆。牆中有大門,大門邊掛「北部教會本部」ê看板。牆-á內面,有一台飛機teh空降物件。牆ê左手爿有「歡迎潘」等字。牆ê外口有一個人teh講話,伊講”Tàu-tíPak pō˙Kàu-hōe sīteh chhòng Ma-Kai tong-si”。這句話用客語講「Ma-Kai」,真明顯是針對偕叡廉先生講--ê。

1935年7月ê《教會報》有一份廣告。這份廣告將頂面畫ê圖攏文字化,這篇廣告占3/4 ê版面,毋bat有人提出來講,咱來看這份廣告:

Hoan-gêng Phoan Tō-êng Bo̍k-su

歡迎潘道榮牧師

請安列位看報ê兄姐

淡水教會,佇6月初,有聚集和會,選舉潘道榮牧師來做本堂ê牧會者,愛伊來ê數額,有四分之三以上;這實在通感謝上帝,因為大家有聽見伊ê說教不止受大感動。

淡水教會ê會友,有熱切teh向望潘道榮牧師,會得緊來赴任,擱大大
希望親愛ê兄姐,佇祈禱ê中間,tì-ì替阮求上帝施恩,予這項事會得緊成(chiân),是心所願。

淡水教會

小會議長Uípí-tek

對頂面ê廣告文看起來,淡水教會有請潘道榮去講道--過,嘛想欲聘--他。他原起先應該有同意,nā無,無可能開和會。毋拘,可能是「新人運動」ê人ê反對,嘛有可能南中東門ê人teh叫--他,他最後無去淡水教會。這份廣告文嘛反映出淡水教會感覺著潘道榮可能袂去淡水,chiah會寫出「緊來赴任」、「替阮求上帝施恩」等等ê字句。代誌ê最後是,潘道榮轉去南中東門。淡水教會後來請汪宗埕牧師擔任第二任牧師。時間佇1937年4月15日。汪宗埕ê後輩,長青團契卡熟似--ê是陳美蕙牧師,她愛叫汪宗埕「外公」。

潘道榮是台灣教會頭一個公費送去日本留學ê牧師。他對台灣教會ê主日學kap《教會報》,攏留落真深ê痕跡。(註3)伊ê語文能力嘛真好。伊bat留一首詩佇咱中間,就是《新聖詩》第20首〈聖父上帝tiàm天頂〉。台灣教會頭一擺用這首詩是1936年ê《聖詩》。

人生ê路,常常會拄著十字路口。愛行向正爿,抑是左爿。這是咱一世人常常會經驗著-- ê,看潘道榮,想咱家己。只有懇求天父助咱,予咱選擇-- ê,是伊所愛-- ê 。

注釋

1請參考〈俟命父子苦讀約伯〉kap〈潘道榮當東門副牧〉。賴永祥,《教會史話
  第五輯》,(台南:人光,2000年1月)頁217-218,221-223。

2有關加拿大教會聯合運動對台灣ê影響,請參考鄭仰恩〈論加拿大教會聯合運
  動及其對台灣教會的影響〉。收佇鄭仰恩,《定根本土的台灣基督教》(台
  南:人光,2005)頁25-157。

3請參考盧啟明〈日治時期和教會公報的耕耘者—潘道榮牧師〉,《新
  使者130期》(台北:台灣基督長老教會新使者雜誌社,2012年6月)頁53以下。

同作者相關文章:
【台灣教會史ê台文筆記3】不時刊做伙ê廣告(下) (第 159 期)
【台灣教會史ê台文筆記3】不時刊做伙ê廣告(上) (第 158 期)
【台灣教會史ê台文筆記3 】莊松榮ê「全鹿丸」kap蘇振輝ê「人生醫院」 (第 157 期)
台灣教會史ê台文筆記 2 ─ 南中東門教會、潘道榮、淡水教會 (第 156 期)
台灣教會史ê台文筆記1 得恩堂與補腎丸 (第 155 期)
《鄭兒玉牧師ê文化思想Kap推動:1961-2002母語寫作所顯出- -ê》序 (第 139 期)
《新使者》二十年雜感 (第 121 期)
編者的話 (第 76 期)
編者的話 (第 75 期)
編者的話 (第 74 期)
編者的話 (第 71 期)
編者的話 (第 67 期)
編輯者的話 (第 66 期)
編者的話 (第 63 期)
編者的話 (第 54 期)
編者的話 (第 53 期)
編者的話 (第 52 期)
編者的話 (第 51 期)
編者的話 (第 50 期)
編者的話 (第 49 期)
編者的話 (第 47 期)
編者的話 (第 46 期)
編者的話 (第 43 期)
編者的話 (第 42 期)
編者的話 (第 41 期)
編者的話 (第 40 期)
編者的話 (第 39 期)
編者的話 (第 38 期)
編者的話 (第 37 期)
「現代中文譯本」與「和合本」之比較:以撒母耳記為例 (第 37 期)
編者的話 (第 36 期)

原文來自 http://newmsgr.pct.org.tw/magazine.aspx新使者雜誌 第 156 期 愛及曠野 (69-71頁)
新使者雜誌 The New Messenger  156期  2016年  10月 愛及曠野 156
本期主題:愛及曠野
發行日期:2016/10/10
愛及曠野
故事的居所,傳揚的百姓
從「被解聘的鄉下牧師」到「環境倫理學之父」
荒野地、野生動物與基督徒
看顧自然:從事實到價值,從尊敬到尊祟
找家——羅斯頓的生態哲學
健康之道——側寫羅斯頓教授訪彰化西南沿海
懷念駱維仁博士:台灣聖經神學研究的巨人
當美術館變成聖殿——安力․給怒的宗教藝術
泰澤東亞聚會分享
感謝主讓我們遇見彼此的差異
慈悲禧年的世界青年日
追求具有「公共化意義」的歷史記憶
我跟你們一樣是罪人,只是你們說我犯的罪是同性戀
關於愛滋,你到底恐懼什麼?
讀經筆記25─華語「初熟」,台語講「頭水」
台灣教會史ê台文筆記 2 ─ 南中東門教會、潘道榮、淡水教會
關於資本主義和信仰的一些思考
溫柔的實踐:第53屆神研班心得
送聖誕特刊給需要的人