新使者雜誌
簡介
雜誌閱讀
出版叢書
購買訂閱
相關網站
聯絡我們
推文:Facebook plurk twitter
新使者雜誌 > 第157期 看見──約翰福音
字級調整:

母語葡萄園
【台灣教會史ê台文筆記3 】莊松榮ê「全鹿丸」kap蘇振輝ê「人生醫院」
干單看廣告,tio̍h看出濟濟故事。
關鍵字:
作者/張德麟 (牧師,中山醫學大學台文系退休教授)

1932年5月以後,《教會報》chiah出現ha̍h佇現代定義ê廣告。會出現這款廣告,理由真簡單,《教會報》佇彼陣有經濟壓力,須要刊登廣告增加收入。這款ê廣告,我大約ka巡一遍。感覺佇《教會報》頂面刊ê廣告,有不止強ê基督徒色彩。下面簡單說明一下。

一、《教會報》ê廣告有「奉獻型」ê廣告

《教會報》欠錢。開始刊登廣告ê時,教會內有一寡人干單掛名贊助,無推銷任何產品。可比講,李仲義長老刊登袂少這款廣告,伊ê廣告文頂面,正爿寫萬丹,正中寫李仲義,左手爿寫東港郡萬丹庄。這款刊法用這陣ê話講,tō是奉獻。刊這款「奉獻型」ê廣告ê人有巴克禮、萬真珠、李仲義、李明家、李明道、阮朝臨、李達莊、高十三等等。

二、《教會報》ê廣告,刊登者強調伊是基督徒

這款廣告,咱用1932年5月ê一篇廣告文做例。有一位辯護士刊廣告。廣告文ê正爿寫「此人係基督教信者為人親切辦事謹慎」。正中寫「辯護士法學士安里積千代」。左手爿寫「台南市大宮町三ノ三四,電話四五九番。」,這款佇廣告文中強調刊登者是基督徒ê數量mā袂少。擱舉一例,1933年3月ê《教會報》,刊一間「三美洋服店」ê廣告。三美佇台東beh對「四月一日起」「正式開業」。佇《教會報》刊廣告。廣告ê主文攏用白話字。伊按呢寫:「洋服裁斷師及職工招聘」。本文ê第一句tō寫:「本店是台東教會熱心ê信徒開--ê……。」伊招聘師父,第一項條件是:「實在ê基督徒」。這款廣告不止有會內ê人ê特色。

三、刊登者請牧師、前輩寫推薦文

這種ê廣告,嚴格講起來, 嘛會使算第二類。毋拘,in請牧師、名人為in寫推薦文。這篇「推薦文」常常牽連著擱較濟ê人kap代誌。所以佇chia,筆者ka分別處理。

這款ê廣告,本文就用莊松榮藥房ê「全鹿丸」kap蘇振輝ê「人生醫院」做例。

※莊松榮藥房ê「全鹿丸」

1933年5月莊松榮藥房ê「全鹿丸」佇《教會報》刊第一擺廣告。然後連續廣告十期到1934年2月。這十期ê廣告文攏是全版--ê,而且攏刊佇廣告ê第一頁。

莊松榮藥房ê創始者是莊溫萌先生。伊是旗後教會ê會友。所以伊請旗後教會ê牧師許水露佇廣告文ê頂頭tàu講幾句話,許水露牧師按呢寫:

莊溫萌君,就是敝旗後教會故莊發長老ê令郎。做人誠實、親切。  

藥品頂真,效力真大。請欠用ê兄姐贊成試看。

這篇廣告文用白話字寫。而且iáu是ch、ts分開用。就是見若後面ê母音是a、ng、o、o.等後元音,頭前用ts,若是後面ê母音是e、i等前元音,頭前用ch。所以許水露牧師寫莊溫萌是寫「Tsng Un-bêng」。(附記:許水露牧師是高俊明牧師娘高李麗珍ê親生老父,嘛是kā我行「幼兒洗」ê牧師。)

這篇廣告文佇「莊松榮藥房」頂面有四字「登錄商標」。予咱thang知,台灣人佇日本時代已經有智慧財產權ê觀念。1883年3月,濟濟國家佇巴黎有簽一份<保護工業產權ê巴黎公約>。為著無beh予無正當ê競爭發生,這份公約保護有專利ê外觀設計、廠商名稱、商標……。日本人佇1899年加入,chiân做第18個會員國。台灣人是通過日本人知影智慧財產權ê重要性。譬如講1938年6月吳純仁醫師「榮安堂大藥房」ê「開胃健脾丸」,有註明「登記商號」。擱佇邊--a列「注意」二字。下文講「近有無恥之徒,假冒本藥名稱。購服諸君,必須認明本舖住所,並登記商號榮安堂藥房吳純仁,庶不至誤為要。」

按呢,咱tō會使來了解「全鹿丸」矣。這篇廣告文有三個重點:(1)「全鹿丸」是「生精補血第一良品」。(2)這項藥「功效主治」:「氣血雙補,男婦皆宜。益百虛、養五臟、固精髓、壯筋骨、定心志、安神魂……。」(3)這項藥對叨位來?佇廣告文ê左手爿,有漢字kap白話字強調這是中國天津同仁堂ê名藥。為著「天津同仁堂」這個詞,我有請教現今「莊松榮」科學中藥ê家族成員莊孝武君。伊kā我講,佇in阿公(莊溫萌) ê時代,中國同仁堂有二間:北京同仁堂kap天津同仁堂,In彼此是兄弟仔。台灣ê「莊松榮藥房」是in阿公莊溫萌開始--ê。溫萌君攏對台灣the̍h龍眼乾、nāi-chi-chí(nāi-chi-khak-á)去天津賣,順續交涉佇台灣代理天津同仁堂ê藥品ê代誌。所以佇「莊松榮藥房」ê右手爿,有特別強調「莊松榮」是「全鹿丸」ê「台灣總經理」。

莊溫萌先生有二男一女。男是莊恭仁、莊恭禮,女是莊玉帛(埔基前院長趙文崇ê老母)。莊恭仁生三男一女,莊孝彰(莊松榮製藥廠有限公司ê董事長兼總經理)、莊孝武(執行副總)、莊孝潤(總廠長)。一女莊雅惠(財務長)。莊恭禮ê後生是莊孝昌、莊孝盛。莊孝昌大學ê時佇文化長青,孝盛佇成大SCM,孝昌現此時teh讀台大景觀設計所ê博士班。孝盛目前佇竹塘教會,佇庄腳做濟濟予人感動ê工。孝盛牧師ê家庭是照叔伯排,孝彰、孝武、孝潤、孝昌、孝盛。所以孝盛是上細漢--ê。伊kā我講,伊囝仔時代是食紅棗、肉桂、甘草、龍眼乾大漢--ê。愛擱記一句,莊松榮藥廠ê家族對奉獻真kam。佇濟濟所在我攏看tio̍h in ê奉獻,親像南神、台灣聖經公會。

※人生醫院

廣告ê時請牧師、名人tàu講話iáu有一個出名ê例,就是彰化ê「人生醫院」。

1933年4月,《教會報》刊台灣醫學士蘇振輝ê「人生醫院」ê廣告。這個廣告一直刊到1940年12月,頭尾總共7年外。這個廣告擱分兩個階段。第一個階段對1933年4月到1938年3月,第二個階段對1938年4月到1940年12月。第一個階段,佇廣告文正中央用白話字列15項耳鼻nâ-âu ê 症頭;第二個階段,「耳鼻咽喉科專門」這幾字斜45度,右手爿寫「彰化市東門町人生醫院院長蘇振輝」。頂二個版本攏無牧師、名人ê紹介。毋拘,1933年4月刊廣告ê時,廣告佇第24頁。佇《教會報》當期ê第18頁,有兩個人寫文章、寫詩慶賀蘇振輝開業。一篇是林燕臣ê文章「謹祝台灣醫學士蘇振輝君開業式」。另外一篇是楊註寫ê七字仔「祝蘇振輝先生開業式」。這兩篇祝賀文、詩刊佇《教會報》本文內,伊ê效果應該比廣告擱較廣告,所以筆者mā kā人生醫院ê廣告列佇遮處理。

祝賀ê詩文佇遮干單舉林燕臣老牧師ê文章做例。林燕臣寫:

竊思基督徒處世。無論所學何藝。所擇何術。不可徒求利己。亦當專務利人。正宜如塩如光,大有益於社會。方不愧為聖徒。若蘇君振輝。台灣醫學士也。方其在校也。天資明敏。學業精勤。蒙博士上村恩師之愛顧。特別傳授重要病症。蓋耳鼻喉科等症是。迨昭和五年。畢業成績優等。有蘭大衛博士物識之。特聘蘇君援助彰化醫務。不特手段成功。患者多數受其惠愛。而且、殷勤竭力。治理諸會務致中選長老之重任。并荷青年之會長。其令聞令望。教會社會。多見口碑載道。斯人也。上可歸榮於  上主。下可丕顯於慈視。幸何如也。夫蘇君之令尊。固熱誠之宗教家,數十年來牧會忠勤。聖教興隆。今也有此令息。對教會亦熱衷。肯構肯堂是父是子。同出愛 主之心。殊不可多得。茲擇彰化街東門。為住在場所。並以二階兩座之大廈。分為男女諸病室。衛生完備。定於三月二十八日。駿業開張。諒必宏圖丕振。鄙人因藉管城子。謹撰俚詞。欣為祝云。

昭和八年三月二十八日 林燕臣

這篇賀詞,筆者認為有三個所在咱著注意。頭一個,佇1933年,林燕臣前清老秀才就用「上主」稱「上帝」。這會當予咱知,講「上主」是取一字基督教「上」字,天主教一字「主」字,以後chiàh有「上主」這個詞。這種了解絕對毋對。第二,文章中講蘇振輝ê老父是牧師:「固熱誠之宗教家。數十年來牧會忠勤。」筆者有請教一寡仔前輩,親像戴忠德牧師、孫鴻鎮牧師,chiah知,蘇振輝醫生ê老父是彰化教會第二任牧師蘇育才。In攏kā我講,早期南部教會有一句名言:「做袂來,揣蘇育才;做袂成,揣高篤行。」,意思是早期牧師、牧師娘攏真gâu做媒人。若是做袂來、袂成,著揣蘇育才、高篤行。對這句話thang知,in兩人ê口才相當好,真gâu kā 人苦勸。第三,林燕臣老秀才ê文章後面記時間是「昭和八年」,是1933年。許雪姬教授總策劃ê《台灣歷史辭典》一版一刷第1348頁有「蘇振輝」詞條。王美雪寫蘇振輝「曾與蘭大衛院長共同募款改建彰化基督教醫院,1935年在彰化市開設耳鼻喉科醫院,……」這段文字,時間真明顯記m̄對。是1933,毋是1935。王美雪是參考《國史館現藏民國人物傳記史料彙編第十六輯》這本冊,可能來源tō 走精--矣。

蘇振輝醫師佇1937年tih著『傷寒』,佇台中病院(應該是這陣ê部立台中醫院)蹛院86工,險死。病後,蘇育才牧師佇1937年10月ê《教會報》寫一篇〈蘇育才ê感謝〉,感謝上帝施行拯救,救伊ê子。嘛感謝眾教會ê代禱。

蘇振輝有藝術天份,伊會e-violin,會寫詩。《新聖詩》107首〈在早佇郇城〉ê歌詞是伊寫--ê。歌詞講:「在早佇郇城各各他的山頂,歸群人及兵丁看見主受釘。救主耶穌復活,救主耶穌復活;吟講,哈利路亞!哈利路亞!今日救主復活,基督阮的王。」二次大戰後,蘇振輝佇真濟方面有表現。伊設立精誠中學,出任董事長。伊mā組織彰化市第四信用合作社,bat受選做全國信用合作社聯合社主席。伊對政治mā參與真深,bat做過第一、二屆省議員,mā bat佮呂世明拚彰化縣縣長,可惜拚輸。伊佇1997年4月15日安息,享年91歲。

干單看廣告,tio̍h看出濟濟故事,看《教會報》、《新使者》,無仝ê角度會當看出無仝ê故事。這Kám-m̄-si真趣味leh?

同作者相關文章:
【台灣教會史ê台文筆記3】不時刊做伙ê廣告(下) (第 159 期)
【台灣教會史ê台文筆記3】不時刊做伙ê廣告(上) (第 158 期)
【台灣教會史ê台文筆記3 】莊松榮ê「全鹿丸」kap蘇振輝ê「人生醫院」 (第 157 期)
台灣教會史ê台文筆記 2 ─ 南中東門教會、潘道榮、淡水教會 (第 156 期)
台灣教會史ê台文筆記1 得恩堂與補腎丸 (第 155 期)
《鄭兒玉牧師ê文化思想Kap推動:1961-2002母語寫作所顯出- -ê》序 (第 139 期)
《新使者》二十年雜感 (第 121 期)
編者的話 (第 76 期)
編者的話 (第 75 期)
編者的話 (第 74 期)
編者的話 (第 71 期)
編者的話 (第 67 期)
編輯者的話 (第 66 期)
編者的話 (第 63 期)
編者的話 (第 54 期)
編者的話 (第 53 期)
編者的話 (第 52 期)
編者的話 (第 51 期)
編者的話 (第 50 期)
編者的話 (第 49 期)
編者的話 (第 47 期)
編者的話 (第 46 期)
編者的話 (第 43 期)
編者的話 (第 42 期)
編者的話 (第 41 期)
編者的話 (第 40 期)
編者的話 (第 39 期)
編者的話 (第 38 期)
編者的話 (第 37 期)
「現代中文譯本」與「和合本」之比較:以撒母耳記為例 (第 37 期)
編者的話 (第 36 期)

原文來自 http://newmsgr.pct.org.tw/magazine.aspx新使者雜誌 第 157 期 看見──約翰福音 (64-67頁)
新使者雜誌 The New Messenger  157期  2016年  12月 看見──約翰福音 157
本期主題:看見──約翰福音
發行日期:2016/12/10
看見──約翰福音
不願被馴服的信仰團體
道與真光的創造:約翰福音前言(1:1-18)淺析
對話:關於約翰福音4:1-42
第14位淚眼使徒
就是一場冒險──給大專生的讀經分享
「找到」的喜樂——關於少年潘霍華
為排灣族翻譯聖經聖詩的懷約翰牧師
西斯特宏隱修院的復活節
愛,得以戰勝死亡
黑暗之光:遠藤周作的《沉默》與幕府時代的基督徒迫害
尋找愛情,卻尋見自己
愛與自由—社青讀經營感想
永遠的客家老師─邱善雄牧師
【讀經筆記26】「兩粒奶」敢有影bē見得眾?  
【台灣教會史ê台文筆記3 】莊松榮ê「全鹿丸」kap蘇振輝ê「人生醫院」
如果生命就像單車環島繞一圈
褪下保護色:第12屆同訓營心得
一個基督徒關心同志議題的心聲
平安歸與祂所喜悅的人