新使者雜誌
推文:Facebook plurk twitter
新使者雜誌 > 第158期 家
字級調整:

母語葡萄園
【台灣教會史ê台文筆記3】不時刊做伙ê廣告(上)
關鍵字:
作者/張德麟 (牧師,中山醫學大學台灣語文學系退休教授)

頂一期寫「莊松榮藥房」第一擺佇《教會報》刊廣告ê時間是1933年5月(《教會報》578卷)。這期iáu有一個真有意思ê現象,tō是對這期開始,《教會報》將四個醫生館ê廣告kā刊做伙,連續8個月久。這四間病院是:嘉義十全醫院、台南青峰醫院、燕巢瑞安醫院、大甲德仁醫院。這四間病院ê家族故事,會使對台灣早期教會史講到今仔日。下面筆者紹介這四間病院ê院長以及in ê 後代對教會、社會ê影響。

※十全醫院

「十全病院」ê創設者是林朝乾醫生。林朝乾,嘉義人。伊是台北醫專第一屆ê畢業生。醫專畢業後,伊有去東京進修,the̍h醫學士ê學位。林朝乾有領導能力,佇醫專ê時,伊bat做過「醫專青年會會長」,mābat 做過彰化基督教病院ê院長、私立博愛救濟院ê董事、嘉義盲人中心ê董事。佇教會,伊是嘉義東門教會ê長老、主日學校長、國際基甸會嘉義分會會長。林朝乾嘛真有疼心,佇醫專ê時,當伊知影有同學因為經濟ê原因無法度繼續讀冊,伊就揣2、3個同學對這ê有困難的同窗chhun-chut幫贊ê手。這位受幫贊ê同學,畢業了去馬來西亞,佇hia做醫生,幫贊濟濟艱苦人。頂面ê資料是對盧萬德長老(筆者ê主日學老師)佇1966年6月初一《教會報》寫ê〈故林長老朝乾小傳〉整理出--來-ê。

林朝乾醫生娶陳老英長老ê三女陳全員。後來林朝乾醫生kap伊ê後生ê事業攏有「全」--字。這字是對陳全員來--ê。

林朝乾日本時代佇嘉義開「十全醫院」。大子林慶秋kap太太簡玉華開「十全幼稚園」。二子林慶中,國防醫學院畢業,接辦嘉義ê十全病院。三子林慶國,台大醫學院畢業,佇台北開ê病院嘛叫十全,到今仔日iáu teh幫贊艱苦人。佇教會,頭前已經講過,林朝乾是嘉義東門教會ê長老。下一代林慶秋嘛擔任嘉義東門教會ê長老。林慶國佇台北,是第一教會ê長老。

※青峰醫院

台灣早期ê教會史,台南劉光求家族一定愛講--tioh。劉光求生瑞仁、瑞琛、瑞山、錫五。劉錫五這房,查甫有清風、青黎。青峰醫院ê劉清風to̍h 是劉錫五ê後生。

劉清風1900年佇台南出世,台南讀「尋常小學校」。了後,去日本讀同志社中學。日本同志社中、大學ê創辦人是新島襄(日本人佇外國the̍h大學學位ê第一人)。台灣人去日本讀同志社中學ê人真濟,親像林茂生、陳能通、陳清忠、高天成……。劉清風住這款氣氛中(特別受林茂生影響)去日本讀同志社中學。同志社中學畢業,伊去美國讀大學讀冊,入South Dakata大學,1924年畢業。畢業後擱入印第安那大學ê醫學院讀醫科。佇1926年畢業,the̍h MD ê學位。劉清風無想tioh,伊佇印第安那大學the̍h醫學士學位,soah創造一項「台灣第一」。Tō是伊是台灣人頭一個佇美國讀醫學院擱the̍h著醫學士學位ê人。

劉清風轉來台灣,佇台南開「青峰醫院」(1929年6月)。1931年伊kap日本東京女子醫專畢業ê莊采芳結婚。結婚後兩人做伙佇清風病院醫治患者。1940年11月,日本人要求戴仁壽醫生ài佇24點鐘內離開台灣。戴仁壽離開後,接戴醫生「樂山園」工課ê人tō是劉清風。

對文獻看起來,劉清風早期可能有「祖國意識」。伊佇美國醫學院ê畢業證書正名用日本羅馬字寫Seifu Ryu。括弧寫chin-feng Liu(注1),無用台語白話字。伊美國畢業後去中國上海復旦大學生物系做教授mā兼做系主任。真有可能佇二次大戰戰後,感受著中國人無公道對待台灣人。伊後來真清楚表明伊ê「台灣獨立」立場。這款日本時代,對「祖國」有期待,戰後soah變台獨ê例真濟,劉清風m̄是孤例。

寫到chia,beh kā大家講一項我心內ê小祕密。劉姃姃是劉清風ê查某子。我高中佇嘉義北榮教會參加聖歌隊ê時,劉姃姃是指揮。我決定後擺娶某ê時,欲娶有氣質ê某,是看tio̍h姃姃姐以後決定--ê。

註一:朱真一《台灣早期留學歐美的醫界人士》(台北:望春風,2004)頁50-  56。

【更正】

《新使者》157期筆者寫〈莊松榮ê「全鹿丸」kap蘇振輝ê「人生醫院」〉。有淡薄錯誤,下面是更正ê文字:

佇莊松榮藥房這部份,筆者寫莊松榮藥房是莊溫萌先生開--ê。按呢寫m̄對。莊松榮藥房開始ê人是莊溫萌ê阿公莊文作先生。1873年(清同治12年)佇旗後開設「莊松榮藥房」。多謝莊孝武兄提供正確ê資料。

林燕臣佇1933年用「上主」這個詞(68頁)。後面,筆者ê文章寫:《紅皮本台語聖經》講『上主』是取一字基督教『上』字,天主教一字『主』字,以後chiah有『上主』這個詞,這種了解絕對m̄對。頂面ê文字有小可亂--去。筆者欲表達ê意思是:「有人講,《紅皮本》以後,chiah有上主這個詞是m̄對-- ê。」

同作者相關文章:
【台灣教會史ê台文筆記3】不時刊做伙ê廣告(上) (第 158 期)
【台灣教會史ê台文筆記3 】莊松榮ê「全鹿丸」kap蘇振輝ê「人生醫院」 (第 157 期)
台灣教會史ê台文筆記 2 ─ 南中東門教會、潘道榮、淡水教會 (第 156 期)
台灣教會史ê台文筆記1 得恩堂與補腎丸 (第 155 期)
《鄭兒玉牧師ê文化思想Kap推動:1961-2002母語寫作所顯出- -ê》序 (第 139 期)
《新使者》二十年雜感 (第 121 期)
編者的話 (第 76 期)
編者的話 (第 75 期)
編者的話 (第 74 期)
編者的話 (第 71 期)
編者的話 (第 67 期)
編輯者的話 (第 66 期)
編者的話 (第 63 期)
編者的話 (第 54 期)
編者的話 (第 53 期)
編者的話 (第 52 期)
編者的話 (第 51 期)
編者的話 (第 50 期)
編者的話 (第 49 期)
編者的話 (第 47 期)
編者的話 (第 46 期)
編者的話 (第 43 期)
編者的話 (第 42 期)
編者的話 (第 41 期)
編者的話 (第 40 期)
編者的話 (第 39 期)
編者的話 (第 38 期)
編者的話 (第 37 期)
「現代中文譯本」與「和合本」之比較:以撒母耳記為例 (第 37 期)
編者的話 (第 36 期)

原文來自 http://newmsgr.pct.org.tw/magazine.aspx新使者雜誌 第 158 期 家 (66-67頁)
新使者雜誌 The New Messenger  158期  2017年  2月 家 158
本期主題:家
發行日期:2017/2/10
好家在
家庭還有未來嗎?
倫理解決爭議,還是倫理本身就是爭議?—— 籌辦胡伯教授「現代基督教倫理」講座的隨想
德國同性伴侶制度:信仰與人權的雙輸
家:成長之路
其中,最大的是愛
家是什麼? ——從台灣的民主歷史、文化說起
幸福,能不能不只有一種想像?
從未知到肯定的旅程——柬埔寨遊記
在尼泊爾,看見另一種幸福的方式
聆聽家的聲音——心靈三部曲
我的歸宿
台語流行歌壇的傳道師──姚讚福
神權與人權的對立?──基督徒公民看婚姻平權
繼續扎根──高中哲學教育推廣與台灣教會
讀經筆記27  所羅門王時代無「紋銀」chit號物件
【台灣教會史ê台文筆記3】不時刊做伙ê廣告(上)
曠野旅程——畢契靈修營心得
愛在這塊土地上
小小飛魚
我眼中的信仰
來自原鄉的關懷