讀tio̍h chit期（131期）ê《新使者》一句「m̄願kah不義ê政府妥協」，hō͘我想起約20年前ê一段故事。

有一工我透早開車去台北高爾夫球場phah球，入球場會館ê時看tio̍h一位老大人落計程車了後帶球袋入會館，結果阮仝組作伙phah球。Chit位老大人tiāⁿ-tiāⁿphah OB球（界外球，o͘t of bound），一位桿弟tio̍h負責拾4位球員êOB球，有時我tio̍h幫chit位老大人拾球。雖然伊是老芋á，人真良善koh真客氣，每pái拾球tńg來hō͘伊，伊lóng感謝不盡，hō͘我真好印象。

球phah soah，我請伊搭我ê便車tńg去台北，伊koh-khah感謝不盡。一下開車伊就問我：「你kám是基督徒？」我講：「你ná會知？」伊講：「我是基督徒，我老大人tī台北球場phah十gōa年ê球，m̄-bat有球伴替我拾球，我感覺會出你有基督ê疼心......」。

過無joā久伊就問我：「你感覺彭明敏chit-ê人án怎？」我應講：「伊是一個真好ê教授，我真尊敬。」伊講：「我是專門替蔣總統（指蔣介石）來苦勸遭遇關監ê台獨人士寫悔過書ê人，彭明敏有寫悔過書就釋放，m̄-koh魏廷朝lóng m̄肯寫悔過書。」

我tiām-tiām聽，伊繼續講：「我問魏廷朝為甚麼反政府？伊應講：阮老父kā我號名叫做『魏廷朝』，m̄是『魏朝廷』，to̍h是叫我tio̍h去『改朝換代』。我kā伊講：蔣總統抗日成功光復台灣to̍h已經替你改朝換代，你tio̍h mài-koh反政府kám m̄是？。伊應講：我chit-má iáu是叫做『魏廷朝』，所以tio̍h繼續改朝換代！」

老大人講伊tńg去隨時寫「字條」去叫魏廷朝ê戶政事務所，kā「魏廷朝」ê名改做「魏朝廷」，戶政事務所回覆講：「魏廷朝」chit-ê名無符合改名ê條件（pháiⁿ聽á是kah大人物仝名）。

所以魏廷朝tio̍h繼續「改朝換代」。

可惜魏廷朝早死（1999年12月28日因心肌梗塞soah來死亡，享年六十五歲），ǹg望有人koh kā kiáⁿ 號名「X廷朝」，來kā中華民國「改朝換代」，hō͘台灣早日出頭天！。