新使者雜誌
簡介
雜誌閱讀
出版叢書
購買訂閱
廣告刊登
相關網站
聯絡我們

推文:Facebook plurk twitter
新使者雜誌 > 第166期 網路媒體(宣教):談網路文化、現象與需求
字級調整:

本期主題
E世代ê網路福音事工
關鍵字:網路  福音  客語  思羅安  台語  信望愛  聖經網站 
作者/林俊育 (全民台語聖經協會秘書長、台語信望愛網站主編)
 
踏話頭

2001年,李勤岸教授來哈佛大學教台語,伊mā來波士頓台灣基督教會成人主日學教阮台語,hō͘ 我tam-tio̍h咱母語ê滋味hiah-ni̍h-á好,我就án-ne潦落去參與台語文運動。
台語文同工tú-tio̍h我to̍h問:「世界各種語言ê聖經lóng有上網,ná會獨獨無看tio̍h台語聖經?」
 
我kā陳清俊長老用去6年半時間phah好ê《巴克禮白話字聖經》整理好勢,請台灣聖經公會上網,in卻拖到尾á soah無beh上網;台語文界ê人建議kā白話字ê《紅皮聖經》上網,陳清俊長老mā趕緊kā它phah字,來由陳鄭弘堯先生tī「暗光鳥ê厝」上網。
 
Hit時,專攻各種版本聖經上網ê「信望愛網站」,in tùi「暗光鳥ê厝」網站chhōe-tio̍h《紅皮聖經》,就e-mail來請我hō͘ in電子檔案thang上網起lih「信望愛網站」。我hō͘ in《紅皮聖經》ê電子檔案,借chit-ê機會請in來起造「台語信望愛」網站,in一聲to̍h答應。了後koh起造「客語信望愛」、「思羅安」(台語點字)kah《全民台語聖經》網站,利益chē-chē人。
 
我lóng利用回台ê期間去台南,tī信望愛技術組負責人蔡哲民教授下班ê暗時,阮並肩作戰;除了架設以上四个網站以外,伊koh開發台語kah客語ê「全羅轉漢羅」、「漢羅轉全羅」、「華語轉台/客語」、「漢羅Ruby版」kah書寫台語點字ê工具,提升我ê網路作業效率。
 
台語信望愛網站

信望愛全球資訊網是由1990年代「交通大學校園團契研究生小組」發起。In感覺未來是網路資訊ê時代,所以,in先借用校園團契輔導ê電腦來架設,後來就家己chhōe幾个同工做伙寫程式,phah工去買一台電腦,開始架設信望愛網站。
 
我一直感覺網路時代tio̍h架設網站來傳福音,蔡哲民教授答應架設「台語信望愛」網站,ē-sái講是我一生siōng歡喜ê tāi-chì,感謝主!O-ló主!
Hit當時,我koh有真chē台語文資訊,像講我翻譯2年半完成ê《台日大辭典》(1933年由台灣總督府出版,beh hō͘日本來台ê官員學台語;我ê台語老師李勤岸教授講he是siōng好ê台語辭典,用片假名注台語音,koh是日文解說),台語文界lóng ǹg望ē-tàng緊上網thang用。
 
我就kā網站ê內容設定做用「推廣台語」來引chhōa讀者漸漸接近基督教,文字專欄有基督教信仰kah台語文研究參雜做伙,當然是lóng用台語文書寫,大部分lóng是漢羅lām寫。《巴克禮白話字聖經》kah《紅皮聖經》lóng有白話字版kah漢羅版,而且有聖經台語朗讀。
 
Hit當時,教育部有根據教會羅馬字(一般稱做白話字)約修改10%,成做「台羅拼音方案」ê羅馬字系統。台語信望愛網站設計兩个入口:教會羅馬字kah教育部台羅傳統版。Chìn前bat有教會ê青年執事講伊學教育部ê「台羅」,問我台語信望愛kám有台羅版ê網路聖經,伊需要司會讀台語聖經;我報伊tio̍h選伊beh ài ê入門,伊歡喜kah bē講得,一直kā我說多謝。
 
網站koh有提供真chē台語教材,「台灣長老教會白話字基本教材」to̍h是其中之一。有一kóa青年靠chiah-ê台語教材學會曉白話字,mā寫真好用ê手機台語輸入法:iPhone kah iPad ê “lohaka” kah Android ê “Phah Taigi”,hō͘ 我真受感動。
 
客語信望愛網站

台語信望愛網站有ê,客語信望愛網站mā lóng有。Hit當時,我請曾昌發牧師來tàu腳手,m̄-koh伊答應好了後,to̍h走去讀博士;我只好請邱善雄牧師來tàu腳手,伊答應好了後,因為目chiu開刀,soah無法度使用電腦;伊就請伊tī中山醫學大學台語系客語組ê劉敏貞kah涂瑞儀兩位客家人(Hak-kâ-ngìn)來tàu腳手。劉敏貞因為處理客語聖經有受感動,就án-ne受洗。
 

這是台語點字ê網站。我tī 1989年擔任雙連教會服務委員會主委ê時,開拓盲人事工,chit-má每禮拜有二十幾位盲朋友來禮拜。教會一開始to̍h有盲人幹事吳月雲teh製作點字ê週報,hit當時有人報讀。吳月雲tio̍h癌過身了後,由許梅芳擔任盲人幹事,soah無人替她報讀,她只好tùi網路掠華語聖經。有一工,一位盲朋友kā我講:「林長老,台頂teh讀台語聖經,我卻teh摸週報ê華語聖經,真艱苦。」
 
我iáu會記得「疼to̍h是tī別人ê需要上看tio̍h家己ê責任」,所以,我用一年ê時間kah會曉台語點字ê盲朋友共同努力,幾nā暝kah蔡哲民教授並肩作戰,完成思羅安(Sloan,約翰福音第九章)信望愛網站:有點字加有聲ê《巴克禮聖經》kah《紅皮聖經》,《全民台語聖經》完成了後mā隨時上網,hō͘ 盲朋友tī厝裡mā ē-tàng摸點字讀聖經;koh有台語聖詩點字歌詞加Midi伴奏,hō͘ in mā ē-tàng tī厝裡唱聖詩。
 
全民台語聖經網站

全民台語聖經協會出版「台灣長老教會設教150週年記念版」ê《全民台語聖經》了後,有架設以台語聖經為主ê網站:http://ctb.fhl.net,kā全民台語聖經khǹg tī頭前,有全羅版、漢羅版、漢羅Ruby版kah其它信望愛聖經版本。以外,koh有靈修資源(目前有《聖經解釋學導論》kah《Kui年kah Jimmy Carter做伙靈修》)kah輔助工具。
 
結尾ê話

我沿路做chit-ê網路福音事工,沿路招人來加入chit-ê團隊,koh有蔡哲民教授ê網路技術支援,hō͘ 福音ē-tàng傳到天邊海角,jú做jú有成就感。願上帝記念每一个人所做ê工,加添賜福!
同作者相關文章:
E世代ê網路福音事工 (第 166 期)
夜ná深,星ná明 (第 164 期)
青少年ê台灣母語異象 (第 148 期)
魏廷朝ê「改朝換代」 (第 133 期)
教會內vs.教會外e白話字運動 (第 125 期)
Kap 盲朋友唱聖詩 (第 123 期)
路,總是向前延伸 (第 67 期)
安德烈.波伽利的心路歷程 (第 61 期)
好友受洗記 (第 52 期)
讓視障朋友寫出心靈的感受 (第 35 期)

原文來自 http://newmsgr.pct.org.tw/magazine.aspx新使者雜誌 第 166 期 網路媒體(宣教):談網路文化、現象與需求 (26-27頁)
新使者雜誌 The New Messenger  166期  2018年  9月 網路媒體(宣教):談網路文化、現象與需求 166
本期主題:網路媒體(宣教):談網路文化、現象與需求
發行日期:2018/9/10
新酒裝在舊皮袋?「挑戰」或是「道成肉身」
網絡革命:宣教策略以外的考量
從Oh My God到摘星計畫
從印刷到數位:新教文明「五百年來第一戰」
網路帶來的多譯本時代與原文讀經運動
E世代ê網路福音事工
一個還沒說完的故事:青少年網路事工老哇咧求生記
布農族山羌先生貼圖的故事
長老宗與天主教會在巴黎巧遇
芬蘭 極光 旅人
穆斯林的多元面貌:與留台馬來穆斯林的相遇
我如何成為網紅?
《陳夫人》小說台語漢羅版ê緣起
李高安義長老略傳(下):最重要的是「愛」
從服事到陪伴
約伯記的精華(上)
重尋脆弱:讀《脆弱的力量》有感
行動靈修營心得
2018年大專行動靈修營心得
重新擁有受造的美好